Atyraý oblysynda attan qulaǵan 12 jasar bala kanal sýyna batyp ketti
Oblystyq tótenshe jaǵdaılar departamentiniń qoǵammen baılanys tobynan málim etkendeı, oqıǵa búgin, 30 mamyrda bolǵan.
Bul týraly jergilikti ýaqytpen saǵat 15:00-de habar túsken.
«Qurmanǵazy aýdanynyń ortalyǵy – Qurmanǵazy kentinen 38 shaqyrym qashyqtyqtaǵy Safon aýylynda turatyn 2011 jylǵy jasóspirim atpen jasandy kanaldyń arǵy jaǵalaýyna mal aıdap ótpek bolǵan. Sol kezde attan qulap, kanal sýyna batyp ketken. Qutqarýshylar men jergilikti turǵyndar izdestirý jumystaryn júrgizip, saǵat 15:30-da sýǵa batqan jasóspirimniń múrdesin tapty», -dep habarlady departamenttiń qoǵammen baılanys toby.
Іzdestirý-qutqarý jumysyna tótenshe jaǵdaılar departamentinen 8 qyzmetker men 2 tehnıka, Qurmanǵazy aýdandyq polıtsııa bóliminen 1 qyzmetker men 1 tehnıka, aýyldyń 20 turǵyny men 2 qaıyq jumyldyryldy.
«Óńir turǵyndaryna sý aıdyndaryndaǵy qaýipsizdik sharalaryn saqtaýǵa baılanysty profılaktıkalyq is-sharalar júrgizilip keledi. Soǵan qaramastan, jyl basynan beri oblystaǵy sý aıdyndarynda 3 adam batyp ketti. Onyń ishinde 2 bala bar. Qutqarýshylary 4 adamdy qutqaryp qaldy», -dep málim etti departamenttiń qoǵammen baılanys tobynan.
Eske sala ketelik, budan buryn Atyraý oblysynda 15 jasar jasóspirim kanal sýyna batyp ketkenin habarlaǵan bolatynbyz.
Bul oqıǵa keshe, 29 mamyrda tirkelgen.
Bir top jasóspirim Qurmanǵazy aýdanyndaǵy Nurjaý aýylynyń tusymen ótetin Sharon ózeniniń saǵasyndaǵy «Jińishke» kanalynyń tyıym salynǵan jerine sýǵa túsken.
Jergilikti ýaqytpen saǵat 17:07 shamasynda 2008 jylǵy jasóspirimniń tereńdigi 3 metr bolatyn kanal sýyna shomylý kezinde batyp ketkeni anyqtaldy.
Saǵat 19:05-te jasóspirimniń múrdesi sýdan shyǵaryldy.
