Atyraý oblysynda aralas jekpe-jekten halyqaralyq týrnır ótti
ATYRAÝ. QazAqparat - Atyraýdyń Jylyoı aýdanynyń 90 jyldyǵyna oraı aralas jekpe-jekten (MMA) halyqaralyq týrnır ótti, dep habarlaıdy QazAqparat tilshisi óńirlik kommýnıkatsııalar qyzmetine silteme jasap.
Týrnırge Daǵystan, Qyrǵyzstan, Ózbekstan, Tájikstan, Qaraqalpaqstan jáne Qazaqstannan 24 sportshy qatysty. Uıymdastyrýshylardyń aıtýynsha, mundaı jarys aýdan deńgeıinde tuńǵysh ret ótkizilip otyr.
«Jylyoı aýdany ótken jyldyń qorytyndysy boıynsha, «Eń úzdik sporttyq aýdan» ataǵyn jeńip alǵan bolatyn. Jylyoı aýdanyndaǵy aýyldyq okrýgterde sport keshenderi kóptep salynyp, búgingi kúnde sportpen shuǵyldanýshy jastardyń sany kúnnen-kúnge artyp keledi. Osyndaı iri jarystardy aldaǵy ýaqytta da ótkizip turamyz. Atap aıtsaq, oblys ortalyǵynda taekvondodan Azııa chempıonatyn jáne múmkindigi shekteýli jandar arasynda para dzıýdodan Álem kýbogi sekildi iri jarystar ótkizemiz», - deıdi Atyraý oblysy dene shynyqtyrý jáne sport basqarmasy basshysynyń mindetin atqarýshy Nurjaýǵan Tóleýova.
Týrnır qorytyndysy boıynsha, 52 kg salmaq dárejesinde Mańǵystaý óńiriniń sportshysy Ábýtálip Qurmanbaev jeńis tuǵyrynan kórinse, 57 kg salmaq dárejesinde Qyrǵyzstan elinen kelgen Zaırjan ýýlý Zakırjan jeńiske jetti. Al, 62 kg salmaq dárejesinde qazaqstandyq Esen Quraqbaev qarsylasynan basym tússe, 57 kg salmaqta Jylyoı aýdanynyń sportshysy Nurbolat Baıjanov qarsylasynan oza shapty. 66 kg salmaqta jerlesimiz Djahar Shaphatov Reseı elinen kelgen qarsylasynan basym túsip, jeńis tuǵyrynan kórindi. Sonymen qatar, osy salmaq dárejesinde atyraýlyq Samat Jagparov jeńske jetti. 70 kg salmaqta Ádilbek Qaıyrǵalı qarsylasynan basym tústi. Sondaı-aq, 73 kg salmaq dárejesinde Ózbekstan elinen kelgen Ravshanbek Rahmetov qarsylasy qazaqstandyq Nurshat Áýelbaevty jeńse, 57 kg salmaqta qazaqstandyq sportshy Farhat Qojantaev ketken eseni qaıtaryp, jeńiske jetti. 90 kg salmaq dárejesinde qazaqstandyq Jasulan Qasımov Qaraqalpaqstannan kelgen qarsylasyn tize búktirdi.
Al, týrnırdiń basty kezdesýi bolǵan 60 kg salmaq dárejesinde Jylyoı aýdanynyń sportshysy Talǵat Jumaǵalıev óziniń qarsylasy Daǵystan elinen kelgen Tımýr Alıevty aıqyn basymdyqpen jeńdi.
«Búgingi kúni elimizde aralas jekpe-jekke degen qyzyǵýshylyq artyp keledi. Kóp jastarymyz aralas jekpe-jekpen shuǵyldanatyn boldy. Jylyoı aýdanynda ótip jatqan búgingi jarysymyz osymen toqtap qalady dep oılaımaımyn. Aldaǵy ýaqytta osyndaı jarystar kóptep uıymdastyrylady dep esepteımin», - deıdi MMA pankratıon jáne grepplıng federatsııasynyń prezıdenti Saǵyndyq Mekeev.
