Atyraý oblysynda ár otbasynyń jeke áleýmettik kartasy jasalady

ATYRAÝ. QazAqparat - Atyraý oblystyq jumyspen qamtýdy úılestirý jáne áleýmettik baǵdarlamalar basqarmasynyń basshysy Serik Qamıdolla óńirde ár otbasyǵa jeke áleýmettik karta jasaý boıynsha atqarylatyn jumystardy baıandady, dep habarlaıdy QazAqparat.

2019 jylǵy 1 qańtardaǵy derek boıynsha oblysta ataýly áleýmettik kómekti 2 035 otbasy (10 949 adam) alady.

«Osy sanatty azamattar úshin bıýdjette 677 mln teńge qarastyryldy. Qazir atalǵan tizimdi retteý júrip jatyr. Qyzmetkerlerimiz ár úıge baryp, jaǵdaımen tanysýda. Prezıdenttiń muqtaj otbasylarǵa qoldaý kórsetý týraly tapsyrmasyna baılanysty joǵaryda atalǵan somany 1 mlrd teńgege deıin kóterýdi josparlap otyrmyz», - dedi Serik Qamıdolla.

Qazir oblys boıynsha kópbalaly 16 485 ana, múmkindigi shekteýli bala tárbıelep otyrǵan 3341 ana bar.

Serik Qamıdollanyń aıtýynsha, ataýly áleýmettik kómek tabysy kún kóristiń eń tómengi mólsherinen 50% tómen azamattarǵa, otbasylarǵa shartty nemese shartsyz aqshalaı kómek túrinde taǵaıyndalady. Shartsyz aqshalaı kómek - jumyspen qamtýǵa járdemdesý sharalaryna qatysýǵa múmkindigi shekteýli tabysy az adamdarǵa (otbasylarǵa) aı saıynǵy aqshalaı tólemder nysanynda kórsetiletin ataýly áleýmettik kómek túri. Al shartty aqshalaı kómek - jumyspen qamtýǵa járdemdesý sharalaryna jáne (nemese) qajet bolǵan jaǵdaıda áleýmettik beıimdeý sharalaryna tabysy az adamdardyń (otbasylardyń) mindetti qatysýy shartymen olarǵa aı saıynǵy jáne birjolǵy aqshalaı tólem nysanynda kórsetiletin ataýly áleýmettik kómek túri.

«Ataýly áleýmettik kómekti taǵaıyndaý kezinde otbasynyń jıyntyq tabysynan kópbalaly otbasylarǵa (analarǵa), «Kúmis alqa», «Altyn alqa» ıegerlerine, múmkindigi shekteýli balalarǵa beriletin járdemaqylar alyp tastalady. Aı saıyn az qamtylǵan otbasyndaǵy ár balaǵa 20 789 teńge mólsherinde kepildik kómek tólenedi», - dep túsindirdi Serik Qamıdolla.

Sonymen qatar, memleket kómegin múmkindigi shekteýli bala tárbıelep otyrǵandar da ala alady.

S.Qamıdolla buryn ataýly áleýmettik kómegin alyp kelgen azamattardy jumysqa ornalastyrýǵa járdemdesý boıynsha belsendi jumys júrgizilip jatqanyn atap ótti.

«Ataýly áleýmettik kómegin alyp kelgen 10 949 adamnyń 1 525-i turaqty jumyspen qamtyldy. Jalpy alǵanda ótken jyly oblys boıynsha bizdiń basqarmada jumyssyz retinde tirkelgen 24 674 adam jumyspen qamtyldy», -dep atap ótti Serik Qamıdolla.

Ataýly áleýmettik kómekti taǵaıyndaý rásimi bıyl jeńildetildi. Ony alý úshin jeke kýálikti kórsetý kerek. Qujattardy óńdeýge qatysty basqa jumystar memlekettik organdardyń aqparattyq júıeleri arqyly júrgiziledi.