Atyraý oblysynda ár deńgeıdegi máslıhattarǵa 140 depýtat saılanady
Atyraý oblystyq aýmaqtyq saılaý komıssııasynyń aqparatyna qaraǵanda, 19 naýryzǵa belgilengen Parlament Májilisi men máslıhattar depýtattarynyń kezekten tys saılaýyna daıyndyq jáne ony ótkizý jónindegi negizgi is-sharalardyń kúntizbelik josparlary bekitilgen.
«Ortalyq saılaý komıssııasynyń 2022 jylǵy 24 jeltoqsandaǵy №130/625 qaýlysymen Parlament Májilisiniń depýtattaryn saılaý boıynsha №13 bir mandatty saılaý okrýginiń shekaralary Atyraý oblysynyń (ortalyǵy – Atyraý qalasy) shekaralary bolyp aıqyndaldy.
Atyraý oblystyq máslıhatynyń 30 depýtatynyń 50% (15 depýtat) majorıtarlyq júıe boıynsha, 50% (15 depýtat) partııalyq tizimdermen saılanady.
Al Atyraý qalalyq máslıhatynyń 25 depýtaty, aýdandardyń máslıhattarynyń 85 depýtattary tolyqtaı majorıtarlyq júıemen saılanatyn bolady.
Tutastaı alǵanda, aldaǵy saılaýda ár deńgeıdegi 9 máslıhattyń 140 depýtaty saılanýy tıis», - dep habarlady oblystyq aýmaqtyq saılaý komıssııasynan.
Atyraý oblysynda qurylǵan 365 saılaý komıssııasynda 2 429 múshe bar. Onyń ishinde 9 aýmaqtyq (63 múshe), 87 okrýgtik (435 múshe), 269 ýchaskelik (1931 múshe) saılaý komıssııasy jumys isteıdi. Saılaý komıssııalarynyń quramdary, ornalasqan oryndary, saılaý okrýgteri, ýchaskeleriniń shekaralary týraly aqparattar atyrau.gov.kz ınternet-resýrsynyń «Saılaý» bóliminde ornalastyrylǵan jáne jergilikti gazetterge jarııalanatyn bolady.
Eske salaıyq, budan buryn ótken Senat saılaýynda Álibek Náýtıev jeńiske jetken bolatyn.
