Atyraý oblysynda ańshylyqqa shyqqan jasóspirim abaısyzda kisi óltirdi
ATYRAÝ. QazAqparat - Atyraý oblysynda jasóspirim ań aýlaý kezinde 18 jastaǵy jigitti abaısyzda atyp qoıdy, dep habarlaıdy «QazAqparat» HAA tilshisi.
«Oqys oqıǵa oblysqa qarasty Jylyoı aýdanyndaǵy qystaýlardyń birinde bolǵan. 14 jastaǵy jasóspirim atasynyń úıine qonaqqa kelgen. Túnde ol qystaýda qoıshynyń kómekshisi bolyp jumys isteıtin 18 jastaǵy jigitpen ań aýlaýǵa barǵan. Qaıǵyly jaǵdaı sol jerde boldy: bala abaısyzda myltyqtyń shúrippesin basyp, oq jigittiń basyna tıgen. Jigit sol jerde qaza tapqan», - dep habarlady oblystyq ІІD baspasóz hatshysy Nazymgúl Qaısaǵalıeva.
QR QK 104-baby 1-bólimi «Abaısyzda adam óltirý» faktisi boıynsha sotqa deıingi tergeý amaldary bastaldy.
