Atyraý oblysynda ań aýlaý erejesin buzǵandar 862 mln teńge shyǵyn keltirgen
Oblystyq Orman sharýashylyǵy jáne janýarlar dúnıesi aýmaqtyq ınspektsııasynyń bas mamany Nurlan Imanǵalıev aıtýynsha, 15 qyrkúıekte ań aýlaý maýsymy bastalady. Ań aýlaý 15 jeltoqsanǵa deıin jalǵasady.
«Ań aýlaýdyń ózindik erejesi bar. Máselen, qustardy, onyń ishinde úırek, qaz, kekilikti aýlaýǵa 15 qyrkúıekten 15 jeltoqsanǵa deıin, qaban úshin 5 qyrkúıekten 31 jeltoqsanǵa deıin, qoıan, qarsaq aýlaýdyń qysqy maýsymyna 1 qarashadan 15 aqpanǵa deıin joldama alýǵa ruqsat etilip otyr. Al qasqyr aýlaýǵa 1 qańtardan 31 jeltoqsanǵa deıin ruqsat etilgen», -deıdi Nurlan Imanǵalıev.
Onyń málimetinshe, qazir óńirde sútqorektilerdiń 21 túri men qustardyń 114 túri mekendeıdi. Qaban, qasqyr, qoıan, túlki, qarsaq, úırek, qaz, kekilik aýlaý úshin ańshylyq joldamada kórsetilgen janýarlardyń sanyna ǵana ruqsat beriledi.
«Árıne, ár nárseniń ólshemi bar. Barshamyzdyń mindetimiz – tabıǵat baılyǵyn qorǵaý, tynyshtyǵyn saqtaý. Erejeni saqtamaı, ań aýlaý tártibin buzýshylar jaýapkershilikke tartylady. Ańshyda ańshy kýáligi, janýarlar dúnıesin paıdalanýǵa berilgen ruqsatnama, ańshylyq sharýashylyǵy nysanynyń joldamasy, jeke ańshylar úshin qarý men oqtardy saqtaýǵa jáne alyp júrýge ruqsatnama, jyrtqysh qustardy aýlaý kezinde tólqujat bolǵanda ǵana ań aýlaýǵa bolady», -dep málim etti Nurlan Imanǵalıev.
Atyraý oblystyq Orman sharýashylyǵy jáne janýarlar dúnıesi aýmaqtyq ınspektsııasynyń málimetine súıensek, byltyr ań aýlaý erejeleriniń talaptaryn buzǵan 11 adam anyqtalǵan. Olar tabıǵatqa 862 mln 703 myń 200 teńge shyǵyn keltirgen.
Qazir Atyraý oblysynda 6 myńnan asa ańshy resmı túrde tirkelgen. Onyń 3 myńǵa jýyǵy ańshylyqpen turaqty túrde aınalysady.
Eske sala ketelik, buǵan deıin Atyraý oblysynda Kaspıı jaǵalaýynan balyqtyń qyrylǵan orny tabylǵanyn jazǵan bolatynbyz.
