Atyraý oblysynda alyp jigit turady: boıy – 2 metr 15 sm, aıaǵynyń ólshemi – 56
Alyp jigittiń aty-jóni – Parasat Nurǵalıev. Otbasynda 3 aǵasy men bir apaıy bar. Qazir ol otbasynyń kenjesi bolǵandyqtan, Inder aýdanyndaǵy Qurylys aýylynda anasymen birge turady.
«Anashymnyń aıtýynsha, men ómirge kelgende, salmaǵymda da, boıymda da erekshelik baıqalmapty. Aǵalarym men apaıym da orta boıly, men sııaqty emes. Alaıda, ájem iri súıekti bolǵan eken. Ákem de uzyn boıly, keń ıyqty, iri saýsaqty bolypty», - deıdi Parasat Nurǵalıev.
Onyń aıtýyna qaraǵanda, boıy 6-synypta oqyp júrgende óse bastaǵan. Kıimderi qysqaryp, aıaǵynyń ólshemi de úlkeıgen. Al, 9-10-synyptarda oqyǵan kezde 50-ólshemdi aıaqkıim tabý qıynǵa soqqan. 2014 jyly mektepti bitirgende, salmaǵy 120 kelige jetip, boıy 2 metr bolǵan.
«Meniń densaýlyǵymda esh kinárat joq. Boıymnyń uzyndyǵy da, salmaǵymnyń aýyrlyǵy da júris-turysyma kedergi keltirmeıdi. Qazir boıym – 2 metr 15 sm, salmaǵym – 150 keli, al aıaǵymnyń ólshemi 56-ǵa jetti. Kıimdi arnaıy tapsyryspen tiktiremin», - dep kúledi alyp jigit.
Jarsýat aýylynyń turǵyny Baıǵalı Ýtemanovtyń aıtýynsha, aýyl turǵyndarynan «Shapaǵat» qory qurylǵan. Qorǵa jınalǵan qarjyǵa jaqynda Almaty qalasyndaǵy aıaqkıim sheberi Valerıı Voronınge tapsyrys berilgen. Aıaqkıim sheberi Parasat úshin 56-ólshemdi aıaqkıim tigip bergen.
«Bizdiń aýyldyń turǵyndary 2017 jyldan beri qorǵa qarjy jınap, túrli is-sharaǵa demeýshilik jasaımyz. Erekshe jaratylǵan Parasattyń aıaǵynyń úlkendigin kórip, aıaqkıim alýǵa kómektesýdiń jolyn izdestirdik. Astana, Almaty, ózge de qalalardaǵy aıaqkıim sheberlerine habarlastyq. Sonyń ishinen Almatyda turatyn aıaqkıim sheberi Valerıı Voronın taza bylǵarydan 56-ólshemdi aıaqkıim tigip berdi. Aıaqkıim úshin 200 myń teńge tóledik. Almatyda turatyn Jarsýat aýylynyń azamaty Jalǵas Janǵalıev aıaqkıimdi tigý barysyn qadaǵalap, daıyn bolǵasyn tanystarynan berip jiberdi», -deıdi Baıǵalı Ýtemanov.
Qazir alyp jigit Parasat Nurǵalıev dostarymen birge irgetas quıý, sylaq júrgizý sekildi ártúrli jumys isteıdi. Mektep bitirgennen keıin dánekerleýshi mamandyǵyn alǵan.
