Atyraý oblysynda Altyn Orda dáýirine jatatyn qalashyqta qazba jumystary bastaldy
ASTANA. QazAqparat - Atyraý oblysynda orta ǵasyrlyq Aqtóbe-Laetı qalashyǵynyń ornyna qazba jumystary bastaldy, dep habarlaıdy QazAqparat.
«Rýhanı jańǵyrý» baǵdarlamasyn júzege asyrý aıasynda Atyraý oblystyq tarıhı-ólketaný mýzeıi orta ǵasyrlyq Altyn Orda qalashyǵy Aqtóbe-Laetıge arheologııalyq qazba jumystaryn bastady. XIV ǵasyrǵa tıesili qalashyq Atyraý qalasynan 6 shaqyrymda soltústik-shyǵys betinde ornalasqan, dep habarlaıdy Atyraý oblysy óńirlik kommýnıkatsııa qyzmeti.
Búgin, 2 shildede eski shahar ornyna oblys əkiminiń orynbasary Əlibek Nəýtıev baryp, jasalyp jatqan jumystarmen tanysty.
«Arheologııalyq jumystar «Bolashaqqa baǵdar: Rýhanı jańǵyrý» baǵdarlamasyn júzege asyrý aıasynda júrgizilýde, - dedi Ə.Nəýtıev. - XIV ǵasyrdyń qalashyǵy oblys ortalyǵyna jaqyn mańnan tabyldy, bul tarıhty jańasha zerdeleýge jol ashady. Memleket basshysy maqalasynda kıeli jerlerdiń Qazaqstan halqy úshin mańyzdylyǵyn, onymen tanysý óskeleń urpaqtyń babalar júrgen joldy bilýine múmkindik beretinin aıtqan edi».
Kóne qalashyqtyń aýdany 200×80 m, mədenı qabaty jaqsy saqtalǵan. Búginde oblystyq mýzeı qorynda qalashyqtan tabylǵan 500-den astam jədiger bar.
Qalashyqta sýmen qamtý júıesi damyǵan, sol arqyly baý-baqsha ósirilgen. Mədenı qabaty janýarlar men balyqtardyń súıekterinen, keramıka qaldyqtarynan turady. Bul qala turǵyndarynyń mal jəne balyq sharýashylyqtarymen aınalysqanyn kórsetedi.
Qazba ornynan quıma pishini, keramıka, monshaq, júzik, bilezik, zergerlik ónimderdiń qaldyqtary tabylǵan. Arheologtar Altyn Orda qalalarynyń kúmis, mys tıyndaryn da topyraq astynan arshyp aldy.
Atyraý oblysynda «Bolashaqqa baǵdar: rýhanı jańǵyrý» baǵdarlamasyn júzege asyrý maqsatynda úılestirý ortalyǵy ashyldy. Jobalyq keńse baǵdarlamanyń «Týǵan jer», «Kıeli jerler geografııasy», «100 jańa esim» baǵyttaryn iske asyrady. Ortalyq quramyna memlekettik organdar, mədenıet pen bilim salalarynyń ókilderi kirgen. 
