Atyraý oblysynda almanyń 32 túrinen shyryn óndiretin tseh ashyldy
ATYRAÝ. QazAqparat –Atyraý oblysynda Táýelsizdik kúni merekesi qarsańynda almanyń 32 túrinen shyryn óndiretin tseh iske qosyldy, dep habarlaıdy QazAqparat.
Mahambet aýdanynyń Saraıshyq aýylynda alma, lımon shyryny men kvas sýsynyn óndiretin tseh jumys isteı bastady. Jańa tsehtyń jumysymen Atyraý oblysynyń ákimi Mahambet Dosmuhambetov tanysty.
Tsehta táýligine 2 tonna alma, 1,5 tonna lımon shyryny men 1,5 tonna kvas sýsynyn óndiriledi.
«Biz almanyń 32 túrinen shyryn shyǵaramyz. Aldaǵy jyly 500 tonnaǵa deıin alma shyrynyn shyǵarý josparda tur. Daıyn ónimdi ázirge tek Atyraý oblysynda taralady. Keıin batys óńirdegi oblystar men Reseı eline eksporttaımyz. Óıtkeni, ekologııalyq taza ónimniń jaramdylyq merzimi 14 kún bolǵandyqtan, alysqa tasý múmkindigi bolmaı tur. Ónim 80 paıyzy kókónisten, 20 paıyzy sýdan turady. Sý úsh márte súzgiden ótedi. Tsehta ázirge 8 adam jumys isteıdi. Biraq, kóktem, jaz mezgilinde jumysshylar 60 adamǵa deıin kóbeıedi. Jumysqa jergilikti turǵyndar tartylady. Aldaǵy jyldyń qańtarynda Germanııadan tehnologtar kelip, bizdiń mamandarǵa dáris beredi. Oqý merzimi eki aıǵa sozylady. Osylaısha, qyzmetkerlerimiz joǵary dárejedegi maman bolyp shyǵady», - deıdi tehnolog Tamıla Rozmetova.
Saraıshyq aýylynda ornalasqan «Atyraý Agro Ónimderi» seriktestigi – Atyraý oblysynda azyq-túlik beldeýin qalyptastyrýda erekshe úlesi bar kásiporyn. Eshki sútinen qunarly ónim túrlerin naryqqa usynyp otyrǵan kásiporyn ekologııalyq tabıǵı taza baldy da shyǵarady. Qazir kásiporyn jergilikti 50 turǵyndy turaqty jumyspen qamtyp otyr. Buǵan deıin 35 adam eshki súti zaýytynda, 15 adam alma baǵynda eńbek etip kelse, endi shyryn tsehy arqyly taǵy 8 adam turaqty jumysqa ornalasqan.
