Atyraý oblysynda «Alǵashqy jumys orny» jobasy iske asyrylyp jatyr

ATYRAÝ. QazAqparat – Atyraý oblysynda jastardy jumysqa ornalastyratyn jańa joba iske qosyldy. Jańa jobanyń ataýy – «Alǵashqy jumys orny». Atyraý jastar resýrstyq ortalyǵynyń jetekshisi Serik Qadyrov atalǵan joba týraly, jastarǵa maqsatty kómek kórsetýdiń basqa da baǵyttary týraly aıtyp berdi, dep habarlaıdy QazAqparat.

– Qazir jastardyń kóbine jumys tabý qıyn. Joǵary oqý ornyn bitirgen jastar da jumysqa ornalasa almaıdy. Osy oraıda jańa joba jastardy jumysqa ornalastyrýǵa qalaı múmkindik beredi?

– Joba jastar resýrstyq ortalyǵy men jumys berýshiler arasyndaǵy kelisimge sáıkes júzege asyrylyp otyr. Joba aıasynda 51 jas jumysqa ornalasty. Olar jumys isteı júrip, básekege qabiletti bolýǵa múmkindik beretin tájirıbesin jınaqtaıdy. Munda bastysy, jumys berýshi «Alǵashqy jumys orny» jobasyna qatysýshyny eki jyl boıy turaqty jumys ornymen qamtamasyz etýge mindetti bolady.

– Jumys berýshige eńbek ótili joq jastardy jumysqa qabyldaǵansha, tájirıbeli mamandardy taýyp alý jeńil emes pe?

– Bul jobanyń maqsaty – jumys berýshi qosymsha mamandy qabyldaǵanmen, odan eshteńe joǵaltpaıdy. Onyń mindeti – jastarǵa bilim alýǵa múmkindik berý. Turaqty jumys ornyna úmitkerdiń jalaqysyn birinshi jyly jergilikti jumyspen qamtý ortalyǵy sýbsıdııalaıdy.

– Sonda jumysqa ornalasqan jastar qansha jalaqy alady?

​– Bul jobaǵa qatysýshynyń aılyq jalaqysy 20 aılyq eseptik kórsetkish kólemindegi qarjyny quraıdy.

– Al eki jylǵa kepildi jumys alý úshin qandaı múmkindik bar?

– «Alǵashqy jumys orny» jobasy jumys izdep júrgen túlekterdi jumysqa ornalastyrýǵa arnalǵan. Negizgi talap – jobaǵa qatysýshynyń jasy 29-dan aspaýy kerek. Sol sebepten, bul joba jastarǵa qajetti tájirıbe alýǵa múmkindik beredi. Taǵy bir jaıt, atalǵan joba «Eńbek» nátıjeli jumyspen qamtýdy jáne jappaı kásipkerlikti damytý memlekettik baǵdarlamasy aıasynda iske qosyldy.

– Bul jastardyń jumysqa ornalasýyna baǵyttalǵan jalǵyz joba emes shyǵar.

– Ózge de jobalar bar. Atyraý oblysynda 271 jas úzdik bıznes-joba úshin grant aldy. Osylaısha, «Bastaý-Bıznes» jobasy aıasynda óz isin ashý maqsatynda jobasyn sátti qorǵaǵan jastarǵa qoldaý kórsetildi. «Bastaý-Bıznes» jobasymen 401 jas kásipkerlik negizderine oqytýǵa jiberilip, onyń 48-i nesıe aldy. Al, 562 jas qysqa merzimdi oqytý kýrstaryna jiberildi. Kásiptik baǵdar beretin jobamen 1 871 adam qamtyldy. Ótken jyly «Eńbek» nátıjeli jumyspen qamtý jáne jappaı kásipkerlikti damytý baǵdarlamasy sheńberinde 12 791 jasqa áleýmettik qoldaý kórsetildi. Onyń ishinde turaqty jumys oryndaryna 6 776, aqyly qoǵamdyq jumystarǵa – 1 795, áleýmettik jumys oryndaryna 123 adam jumysqa ornalastyryldy.