Atyraý oblysynda áleýmettik nysandar qurylysyn salýǵa 19 jer telimi bólingen
Oblystyq qurylys basqarmasynyń basshysy Nurbergen Qusaıynovtyń málimetine súıensek, 5 jer teliminde bilim berý, 19-ynda medıtsına nysandary men ońaltý ortalyǵyn salý kózdelgen. Qurylys-montaj jumystary 2023 jyly bastalady.
«Qazir qurylys nysandarynyń jobalaý-smetalyq qujattamalary jasaqtalyp jatyr. Máselen, Mahambet aýdanynyń Saraıshyq aýylynda jańa mektep, Atyraý qalasyndaǵy №3, 16 jáne 17 bilim ordalaryna, Maqat aýdanynyń ortalyǵy – Maqat kentindegi №2 orta mektepke 250 oryndyq japsarjaı nysany úshin jer telimi bólindi. Al, densaýlyq saqtaý salasyna qatysty aıtar bolsaq, Atyraý qalasynyń Nursaıa, Órken shaǵyn aýdandarynda 250 oryndyq emhana, munaıly shaharǵa qarasty Amangeldi aýyly men Juldyz shaǵyn aýdanynda dárigerlik-ambýlatorııalyq pýnkttiń qurylysy júrgizilmek. Qurmanǵazy aýdanynyń Súıindik, Balqudyq aýyldarynda dárigerlik-ambýlatorııalyq, al, Mahambet aýdanyndaǵy Taldykól aýylynda feldsherlik-akýsherlik pýnkt salynady», -dep habarlady Nurbergen Qusaıynov.
Onyń deregine qaraǵanda, Qurmanǵazy aýdanyndaǵy Kadyrka, Shaǵyrly, №6 aýyldarda medıtsınalyq pýnktter men múrdehana qurylysyn júrgizý kózdelip otyr. Oblystyq onkologııalyq dıspanser janynan radıologııalyq korpýs, Atyraý qalasynda úsh qosalqy stansasy bar jedel járdem stansasy, 250 tósektik psıhıkalyq densaýlyq saqtaý ortalyǵynyń qurylysy bastalady.
Eske sala ketelik, budan buryn Atyraýda 600 oryndyq jańa mekteptiń qurylysy aıaqtalǵanyn habarlaǵan bolatynbyz.