Atyraý oblysynda áleýmettik mańyzy bar azyq-túliktiń qajetti qory bar

ATYRAÝ. QazAqparat – Atyraý oblysynda áleýmettik mańyzy bar azyq-túlik ónimderiniń 9 myń tonna qory bar, dep habarlaıdy QazAqparat.

Oblystyq Aýyl sharýashylyǵy basqarmasynyń basshysy Amangeldi Salamattyń málimetine súıensek, áleýmettik nan jáne birinshi surypty un baǵalaryn turaqtandyrý maqsatynda úshjaqty memarandým jasalyp, 13 myń tonna bıdaı jetkizý josparlanǵan.

«Aınalym shemasy arqyly alynǵan azyq-túlik ónimderi «Ideal», «Lıder» sýpermarketteriniń 36 jelisinde, kókónis ónimderi «Dına», «Nasıha», «Kóktem», «Saraıshyq» saýda oryndarynda satylyp jatyr. Qazir óńirde áleýmettik mańyzy bar azyq-túlik ónimderiniń 9 myń tonna qory bar. Turaqtandyrý qorynda 579,6 tonna kartop, 325,8 tonna sábiz, 339 tonna pııaz, 200 tonna qyryqqabat saqtaýly tur.

Úshjaqty memorandýmǵa sáıkes, áleýmettik nan baǵasy - 90, al birinshi surypty un 145 teńgeden satylady», -deıdi Amangeldi Salamat.

Eske sala ketelik, budan buryn Atyraý oblysynda suıytylǵan gaz qory jetkilikti ekenin habarlaǵan bolatynbyz.