Atyraý oblysynda aldaǵy aıda 6 medıtsınalyq nysan paıdalanýǵa beriledi
Oblystyq qurylys basqarmasynyń basshysy Nurbergen Qusaıynovtyń málimetinshe, medıtsınalyq pýnktiler Mahambet aýdanynyń Eńbekshil, Kózdiqara, Aqqaıyń aýyldarynda, Jylyoı aýdanyndaǵy Qaraǵaı aýylynda, Qyzyqoǵa aýdanynyń Aıdyn aýylynda salynyp jatyr. Al, feldsherlik-akýsherlik pýnkt qurylysy Isataı aýdanynyń Aqqystaý aýylynda qolǵa alynǵan.
«Bul medıtsınalyq pýnktilerdiń jobasy densaýlyq saqtaý nysandaryna qoıylatyn sanıtarııalyq-epıdemıologııalyq talaptarǵa, qoldanystaǵy normatıvtik qujattarǵa sáıkestendirildi. Sanıtarııalyq qaǵıdalarǵa saı jobalaýǵa arnalǵan tapsyrma negizinde oryndaldy. Medıtsınalyq pýnkt aýmaǵynda sanıtarlyq-gıgıenalyq jaǵdaılardy qamtamasyz etý úshin shaǵyn sáýlet nysandarynyń tolyq jıyntyǵy qoıylady. Nysannyń syrtqy aýmaǵynda kógaldandyrý jumystary júrgiziledi. Atalǵan nysandaryń qurylysy 2022 jyldyń qarasha aıynda bastalǵan. Jobaǵa sáıkes turǵyndar ıgiligine osy jyldyń maýsym-shilde aılarynda paıdalanýǵa beriledi», - dep habarlady Nurbergen Qusaıynov.
Onyń aıtýynsha, medıtsınalyq pýnkt ǵımaraty bir qabattan turady. Onyń jalpy aýmaǵy – 266,35 sharshy metr. Nysandaǵy egý jáne emdeý kabınetteri arnaıy medıtsınalyq jabdyqpen qamtylǵan. Orta medıtsınalyq qyzmetkerler bólmesi, ordınator, akýsher kabıneti bar. Zertteý júrgizýge, materıal jınaýǵa, dezınfektsııa quraldaryn daıyndaýǵa jáne saqtaýǵa arnalǵan bólmeler qarastyrylǵan.
Eske sala ketelik, buǵan deıin Atyraý oblysynda 2025 jylǵa deıin 30-ǵa jýyq medıtsınalyq nysan salynatyn habarlaǵan bolatynbyz. Oblystyq densaýlyq saqtaý basqarmasy baspasóz qyzmetiniń málimetinshe, «Aýyldyq densaýlyq saqtaýdy jańǵyrtý» ulttyq joba aıasynda jańa tıptik jobadaǵy medıtsınalyq nysandar qurylysy iske asyrylyp jatyr. Óńirde 2025 jylǵa deıin osyndaı 30-ǵa jýyq nysandy iske qosý kózdelgen.
