Atyraý oblysynda alaman báıgege avtomobıl tigildi

ATYRAÝ. QazAqparat - 9 mamyr kúni Atyraý oblysy Mahambet aýdanynda Ekinshi dúnıejúzilik soǵystaǵy Jeńistiń 72 jyldyǵyna oraı, alaman báıge men kókpar oıyny ótedi.

Báıgeniń jeńimpazy syılyq retinde avtomobıl alady, dep habarlaıdy «QazAqparat» HAA tilshisi.

«Bul jarystardy Jeńis kúni ótkizip jatqanymyz kezdeısoqtyq emes. Bul - bizdiń bolashaq Otan qorǵaýshylarymyzǵa erlik pen batyldyqty nasıhattaıtyn ulttyq sport túri bolyp tabylady», - dedi aýdan ákimi Álımuhamed Quttymuratuly. Alaman báıge jarysy 24 shaqyrym aralyqta ótkiziledi, jeńimpaz - «Ýaz-Patrıot» avtomobıline ıe bolsa, 2 jáne 3 oryn ıegerleri - 700 jáne 400 myń teńge kóleminde qarjylaı syıaqy alady.

Kókpar oıynynyń jeńimpazyna birinshi oryn alǵany úshin 400 myń teńge, al 2 jáne 3 oryn ıegerlerine sáıkesinshe 300 jáne 100 myń teńge tabystalady. Іs-sharany Mahambet aýdanynyń ákimdigi uıymdastyryp, syıaqylar demeýshilik qarjylar esebinen beriledi.

Jarys 9 mamyr kúni saǵat 11:00-de Aqtoǵaı aýylyna jaqyn jerde Atyraý-Oral tasjolynyń 77 shaqyrymynda ótedi. Alaman báıgeni tamashalaǵysy keletin qala turǵyndaryna kólik beriledi. Ol 9 mamyr kúni saǵat 10:00-de «Nur Otan» partııasynyń qalalyq bólimshesinen  jolǵa shyǵady. Qalaǵa kelý ýaqyty - 14.00. Qatysýshylardy tirkeý 4-7 mamyr aralyǵynda, tolyq aqparatty myna telefondar arqyly alýǵa bolady: 8 (71236) 2-13-75, 8 (71236) 2-11-99 jáne 8 (71236) 2-45-94.