Atyraý oblysynda Aqtóbege shyǵatyn jol ashyldy
ATYRAÝ. QazAqparat – Atyraý oblysynda Aqtóbe - Atyraý-Astrahan tas jolynda Aqtóbe baǵytyna qozǵalys ashyldy, dep habarlaıdy QazAqparat óńirdiń TJ departamentiniń baspasóz qyzmetine silteme jasap.
«QazAvtoJol» UK» AQ málimetinshe respýblıkalyq mańyzy bar Aqtóbe-Atyraý-Astrahan tas jolynyń A-27 ýchaskesindegi negizgi jol ýaqytsha qalpyna keltirildi. Osyǵan baılanysty Atyraý oblysy Qyzylqoǵa aýdany Saǵyz aýylynan Aqtóbe oblysynyń shekarasyna deıin 337-330 shaqyrymda avtokóliktiń barlyq túrleri úshin qozǵalys ashyldy», - dep habarlaıdy Atyraý oblysy Tótenshe jaǵdaılar departamentiniń baspasóz qyzmeti.
Buǵan deıin tas joldy sý shaıyp ketýine baılanysty Atyraý oblysynan Aqtóbege shyǵatyn joldyń jabylǵany habarlanǵan bolatyn.