Atyraý oblysynda ákimdiktiń qyzmetkerlerine qatysty 11 sybaılas jemqorlyq qylmysy tirkelgen
Atyraý oblysynyń ákimi Serik Shápkenovtiń tóraǵalyǵymen sybaılas jemqorlyqqa qarsy kúres jóninde jıyn ótti. Oǵan Atyraý qalasy men aýdandar ákimderi, memlekettik jáne quqyq qorǵaý organdarynyń, kvazımemlekettik sektordyń basshylary men qoǵam ókilderi qatysty.
«Sybaılas jemqorlyq – qoǵam damýyna qaýipti jegiqurt. Bul – elge, bolashaqqa jasalǵan qııanat. Sybaılastyq bar jerde sapa bolmaıdy. Oǵan qarsy kúreske turǵyndar tarapynan baqylaýdyń bolǵanyn qalaımyn. Qoǵamdyq baqylaýdy kúsheıtýimiz qajet», -dedi Serik Shápkenov.
Jıynda Sybaılas jemqorlyqqa qarsy is-qımyl agenttigi preventsııa qyzmetiniń basshysy Saıan Ahmetjanov baıandama jasady.
«Atyraý oblysynda 2021-2022 jyldary memlekettik satyp alýǵa júrgizilgen monıtorıngtiń qorytyndysyna sáıkes 440 mln teńge qarjy únemdeldi. Sybaılas jemqorlyq faktisi boıynsha agenttiktiń koll-ortalyǵyna 1 424 ótinish tústi. Byltyrdan beri ákimdiktiń jáne vedomstvolyq baǵynyshty mekmelerdiń qyzmetkerlerine qatysty 11 qylmystyq is tirkeldi. Onyń 3-ýi birinshi basshy men onyń orynbasarlaryna qatysty bolyp otyr. Agenttik jyl saıyn yqtımal jemqorlyq jaǵdaıyna ishki taldaý júrgizedi. Byltyr ákimdiktegi 25 ákimshiniń jumysy qamtylsa, bıyl 22 ákimshiniń 18-ne taldaý jasaldy» ,-dedi S.Ahmetjanov.
Agenttiń Atyraý oblysy boıynsha departamenttiniń basshysy Erlan Dosanovtyń málimetinshe, sybaılas jemqorlyq faktisi ekologııa, medıtsına, jol salasynda jıi oryn alady.
«Máselen, turǵyndar masa men qoqysqa tolǵan Erik-Mostovoı kanalynyń qurylysyna baılanysty shaǵymdanady. Jobalyq-smetalyq qujat jasaqtaý kezinde qurylys jumystaryna 1 mlrd 336 mln teńge bólingen bolatyn. Alaıda, qate josparlaý men jergilikti atqarýshy organdar tarapynan tıisti baqylaý bolmaǵan. Sol sebepten, 510 mln teńge jumsalǵan kanal qurylysy toqtatyldy. Osyǵan baılanysty atalǵan kanaldy atqarýshy organnyń balansyna ótkizýdi usynamyn», -dedi Erlan Dosanov.
Eske sala ketelik, budan buryn Atyraýda mektep dırektory týysyn jumysqa qabyldap, ol bir kún de istemeı aılyq alyp otyrǵanyn habarlaǵan edik.