Atyraý oblysynda ákimdik esepshisi 18,4 mln teńgeni jymqyrǵan
Atyraý oblystyq tekserý komıssııasynyń múshesi Aslan Qumarovtyń málimetine súıensek, byltyr ýákiletti organdarǵa shara alý úshin joldanǵan aýdıt materıaldary negizinde 256 ákimshilik is qozǵalǵan. Sonyń nátıjesinde 120 jeke jáne zańdy tulǵaǵa 16 mln teńgeniń ákimshilik aıyppuly salynǵan. Tekserý qorytyndysymen 138 laýazymdy tulǵa tártiptik jaýapkershilikke tartylǵan.
«Qyzylqoǵa aýdanyndaǵy Muqyr aýyldyq okrýgi ákimi apparatynyń esepshisi qyzmetkerlerdiń atynan ózine tıesili esepshotqa 18,4 mln teńgeni aýdaryp jibergen. Sondaı-aq, Maqat aýdandyq mádenıet, tilderdi damytý, dene shynyqtyrý jáne sport bóliminiń esepshisi sporttyq is-shara men issaparlarǵa bólingen qarjyny dáleldi qujattarsyz, tıisti buıryqta kórsetilgen somadan artyq kólemde aýdarǵan. Zańsyz aýdarylǵan qarjynyń kólemi 2,6 mln teńgeni qurady. Atyraý qalasyndaǵy №26 «Juldyz» balabaqshasynyń esepshisi 25,6 mln teńgeni quraǵan bıýdjet qarajatyn óziniń jáne týysqandarynyń banktegi kartasyna aýdaryp alǵan. Sot sheshimimen kinálilerge bas bostandyǵyn shekteý jazasy taǵaıyndaldy», -deıdi Aslan Qumarov.
Onyń aıtýynsha, byltyr 31 melekettik, 52 kvazımemlekettik sektor nysandarynda tekserý júrgizilgen. Zańnamasyn saqtamaý sebebinen anyqtalǵan buzýshylyqtardyń jalpy somasy 2 mlrd teńgeni quraıdy. Onyń ishinde qarjylyq buzýshylyqtar – 742 mln teńge. Bıýdjettiń 423 mln teńgesi tıimsiz jumsalǵan. Al tıimsiz josparlanǵan bıýdjet qarajatynyń somasy 1 mlrd teńgege jetken.
Eske sala ketelik, buǵan deıin Atyraýda 6 mln teńgeni jymqyrǵan dırektor sottalǵanyn, keıin ákimdiktiń apparat basshysy qyzmetinen bosatylatyn bolǵanyn jazǵan edik.
