Atyraý oblysynda AI-92 janarmaıynyń ortasha baǵasy 169 teńge turady

ATYRAÝ. QazAqparat –Energetıka mınıstri Bolat Aqsholaqov Atyraý oblysynyń turǵyndarymen kezdesýde AI-80, AI-92, AI-93 janarmaıy men dızel otynyn bólshek saýdada ótkizýge shekti baǵalardy memlekettik retteý saqtalǵanyn málim etti.

Qazir Atyraý oblysynda AI-92 benzıniniń ortasha baǵasy 169 teńgeni quraıdy. Al, dızel otynynyń 1 lıtri – 230 teńge, dep habarlaıdy QazAqparat.

Mınıstrdiń pikirinshe, AI-95 janarmaıyna baǵa belgileý básekeli ortaǵa berilgen. Endi janarmaıdyń bul túrine baǵany naryq aıqyndaıdy.

«Óıtkeni, AI-95 jáne odan joǵary markaly benzındi óndirý kezinde qymbat turatyn ımporttyq qospalar men joǵary oktandy komponentter jumsalady. Mundaı janarmaılardyń baǵasy munaı barreliniń quny men valıýta baǵamyna baılanysty bolady», -dedi mınıstr Bolat Aqsholaqov.

Onyń aıtýynsha, Memleket basshysy Qasym-Jomart Toqaevtyń janar-jaǵarmaı materıaldary naryǵyn reformalaý jónindegi tapsyrmasyn oryndaý maqsatynda birneshe is-shara qabyldanyp jatyr. Aldymen, munaı ónimderin óndirý jáne bólý salasynda ashyqtyq pen transparenttilikti qamtamasyz etý qolǵa alynǵan. Ekinshiden, avtokólikpen munaı ónimderin shyǵarýǵa tyıym salýdy 2022 jyldyń sońyna deıin uzartý týraly buıryq qabyldanǵan. Úshinshiden, saralanǵan baǵalardy ázirleý arqyly dızel otynynyń tapshylyǵyna jol bermeý kózdelgen.

Buǵan qosa, mınıstrlik rezıdenttikke jáne kólik túrine baılanysty dızel otynyna baǵalardy saralaýdy kózdeıtin buıryq jobasyn ázirlep, resmı ınternet-resýrsta jáne «Ashyq NQA» portalyna jarııalady.

Eske sala ketelik, budan buryn Energetıka mınıstri Ázerbaıjan arqyly munaı tasymaldaý jospary joq ekenin málim etken bolatyn.