Atyraý oblysynda aǵaıyndy jigitter júk kóligimen adasyp ketken
ATYRAÝ. QazAqparat – Atyraý oblysynda aǵaıyndy jigitter júk kóligimen adasyp ketken, dep habarlaıdy QazAqparat.
Oblystyq tótenshe jaǵdaılar departamenti baspasóz qyzmetiniń aqparatyna qaraǵanda, bul týraly keshe, 21 aqpanda saǵat 20:20-da habar túsken.
«Aǵaıyndy eki jigit «KamAZ» júk kóligimen Jylyoı aýdanynyń ortalyǵy – Qulsary qalasynan 80 shaqyrym jerdegi Munaıly ken ornyna barýdy kózdegen. Olar 20 aqpan kúni saǵat 12:00-de júk kóligine shóp tıep, jolǵa shyqqan. Sodan keıin olardan esh habar bolmaǵan. Aǵaıyndy jigitterdiń biriniń jasy – 33-te, ekinshisi – 31 jasta», -dep habarlady departamenttiń baspasóz qyzmeti.
Joǵalǵan jigitterdi izdeýge tótenshe jaǵdaılar departamentiniń órt sóndirý jáne avarııalyq-qutqarý jumystary qyzmetinen 3 qyzmetker, jedel-qutqarý jasaǵynan 1 qyzmetkeri men 1 «Trekol» kóligi, aýdandyq polıtsııa bóliminiń 1 qyzmetkeri qatysty. Aǵaıyndy jigitter keshe, 21 aqpanda saǵat 22:17-de Qulsary qalasynan shamamen 50 shaqyrym qashyqtan tabyldy. «KamAZ» júk kóliginiń balshyqqa batyp qalǵany anyqtaldy.
Eske sala ketelik, buǵan deıin Atyraý oblysynda qar qursaýynan 1 jasar balasy bar erli-zaıypty qutqarylǵanyn habarlaǵan edik.
