Atyraý oblysynda adam azaptady dep kúdiktelgen polıtseıler ustaldy
Jylyoı aýdandyq bóliminiń 26 jastaǵy eki jedel ýákiliniń ustalýyn Atyraý oblysy boıynsha Sybaılas jemqorlyqqa qarsy qyzmet qyzmetkerleri júrgizdi. Olar urlyq jasady degen kúdikpen ustalǵan Qulsary qalasynyń turǵynyn kúshpen moıyndatqan. Jaýap alý kezinde soqqyǵa jyǵylǵan er adam sybaılas jemqorlyqqa qarsy qyzmetke aryzdanǵan.
Atyraý oblystyq polıtsııa departamenti eki polıtseıdiń ustalǵanyn rastady. Qazirgi ýaqytta Qylmystyq kodekstiń eki baby boıynsha, 146-baptyń 2-bóligi 1-tarmaǵy (Adamdar tobynyń aldyn ala sóz baılasýy boıynsha jasalǵan azaptaýlar) jáne 362-bap 4-bóligi 1, 3-tarmaqtary (paıda alý maqsatynda kúsh qoldanyp nemese ony qoldanamyn dep qorqytyp bılikti nemese laýazymdy ókilettigin asyra paıdalaný) boıynsha sotqa deıingi tergep-tekserý júrgizilip jatqanyn habarlady.
Ustalǵandar ýaqytsha ustaý ızolıatoryna qamaldy.