Atyraý oblysynda 9 jasar bala 4-qabattan qulap ketti
Oqıǵa keshe, 2 qyrkúıekte Jylyoı aýdanynyń ortalyǵy – Qulsary qalasynda bolǵan.
«Qulsary qalasyndaǵy aýdandyq ortalyq aýrýhanaǵa kópqabatty úıdiń 4-qabatynan 9 jasar bala jetkizildi. Jasóspirim aýrýhananyń jansaqtaý bólimine súıek synyqtarymen tústi. Onyń jaǵdaıy aýyr, travmatologııalyq kúızelis alǵan. Bizdiń aýrýhananyń dárigerleri medıtsınalyq em-dom kómegin jasady», - dep málim etti aýrýhananyń dırektory Nurbek Úkibaev.
Keıin jasóspirim oblystyq balalar aýrýhanasyna jetkizildi.
Oblystyq tótenshe jaǵdaılar departamenti qoǵammen baılanys tobynyń málimetinshe, terezeden qulaýdyń basty sebebi – tutqasy ońaı ashylatyn, ári qorǵalmaǵan tereze.
«Terezedegi masadan qorǵaaıtyn torǵa balalar súıenýge bolady dep oılaıdy. Alaıda, ol balanyń salmaǵyna shydamaıdy. Oqıǵalar hronıkasyna kóbinese 5 jasqa deıingi balalar túsedi. Bul osyndaı oqys oqıǵanyń 80%-yn quraıdy. Sol sebepten, birneshe qarapaıym erejeni este ustaý qajet. Birinshiden, tereze 12,5 sm-den astamǵa ashylsa, balalardyń terezeden qulap ketýi múmkindigi artady. Ekinshiden, barlyq terezege 12,5 sm-den astam ashýǵa múmkindik bermeıtin taqtaı nemese qorshaý ornatý qajet. Úshinshiden, mehanızmderdiń jabyq tereze rejıminde ǵana emes, jeldetý rejıminde de jumys isteýi qadaǵalanýy tıis. Tórtinshiden, balalardy terezeniń qasynda oınatpaǵan jón. Ótip bara jatqan kólikti, ózge nárselerdi kórsetý úshin olardy terezeniń aldyna otyrǵyzbaý kerek. Besinshiden, terezeniń janyna jıhaz qoımaý jáne moskıt toryna senbeý qajet», -dep málim etti qoǵammen baılanys tobynan.
Eske sala ketelik, buǵan deıin Atyraýda bes jasar egiz qyz 3-qabattan qulap ketkenin jazǵan edik.