Atyraý oblysynda 81 muǵalim jalǵan dıplommen jumys istegen
Atyraý oblysynyń qoǵamdyq keńesiniń otyrysynda sybaılas jemqorlyqqa qarsy qoǵamdyq baqylaýdy kúsheıtý máseleleri talqylandy. Sybaılas jemqorlyqqa qarsy is-qımyl agentiginiń oblystyq departamenti preventsııa basqarmasynyń basshysy Jánibek Qarajanov keńes músheleriniń nazaryn bilim berý salasyndaǵy sybaılas jemqorlyq táýekeline aýdardy.
«Bilim salasyndaǵy sybaılas jemqorlyq táýekelderine syrtqy taldaý júrgizý kezinde kóptegen kemshilik anyqtalyp otyr. Máselen, mektepterde «óli jandar» bar. Qyzmetkerler men oqýshylar sany birdeı mektepter ártúrli qarjylandyrylǵan. Bir qyzmetker bir mezgilde 4-5 mekemede jumys istegen. Keıbir bilim berý mekemelerinde basshylar ózderine laýazymdyq jalaqysyna ústemeaqy aýdaryp otyrǵan. Monıtorıng nátıjesinde mektepke deıingi bilim berý mekemelerinde 51, orta mektepterde 30 qyzmetkerdiń jalǵan dıplomdy paıdalanǵany anyqtaldy», - dep habarlady Jánibek Qarajanov.
Onyń aıtýynsha, joǵarydaǵy derekterdi joıý úshin oblystyq Bilim basqarmasyna 26 usynys joldanǵan.
«Qyzmetkerlerdiń kontıngenti boıynsha derekterdi avtomatty túrde salystyrý úshin ıntegratsııany qamtamasyz etý qajet. Jergilikti atqarýshy organ deńgeıinde bıýdjettik ótinimderdi qalyptastyrý, bekitý protsesterin avtomattandyrǵan jón. Bilim berý mekemelerine kirý, shyǵý ýaqytyn formatty-logıstıkalyq baqylaýdy belgileý múmkindigimen qyzmetkerleriniń qatysýyn baqylaý sekildi usynystar bar», - dep málim etti Jánibek Qarajanov.
Eske sala ketelik, buǵan deıin Atyraýda bir mektepte 40 muǵalimniń jumys orny bos turǵanyn jazǵan bolatynbyz.
