Atyraý oblysynda 776 mln teńge qarjyny ıgerýde zań buzýshylyq anyqtaldy
ATYRAÝ. QazAqparat – Atyraý oblysynda úsh aıda 776 mln teńgeniń qarjylyq buzýshylyǵy anyqtaldy, dep habarlaıdy QazAqparat.
Oblystyq Tekserý komıssııasynyń tóraǵasy Ravıl Tólebaevtyń málimetinshe, osy kezeńde 24 memlekettik nysanǵa úsh aýdıtorlyq is-shara ótkizilgen. 19 mlrd 498 mln teńge qarajatqa memlekettik aýdıt jasalǵan.
«Aýdıtorlyq is-sharalar kezinde 776 mln teńge qarjyny ıgerýde el zańnamasy normalarynyń saqtalmaǵany anyqtalǵan. Onyń ishinde qarjylyq buzýshylyqtar – 93,6 mln teńge. Al, tıimsiz paıdalanylǵan bıýdjet qarajatynyń (aktıvterdiń) somasy 214,7 mln, tıimsiz josparlanǵan bıýdjet qarajatynyń (aktıvterdiń) somasy 467,7 mln teńge bolsa, rásimdik sıpattaǵy buzýshylyqtar sany – 229», - dep habarlady Ravıl Tólebaev.
Onyń aıtýynsha, qalpyna keltirýge (óteýge) jatatyn qarjylyq buzýshylyqtardyń jalpy somasy 144 mln teńgeni quraǵan. Memlekettik aýdıt nysandarymen 32 mln teńge qalpyna keltirilgen.
«Taldaý kórsetkendeı, aýdıtorlyq is-sharalardyń qorytyndysymen anyqtalǵan buzýshylyqtardyń aıtarlyqtaı úlesi Bıýdjet kodeksi, Býhgalterik eseptilikti júrgizý normalarynyń saqtalmaýynan bolǵan. Aýdıt qorytyndysyna sáıkes, anyqtalǵan buzýshylyqtardy jáne jumystaǵy kemshilikterdi joıý maqsatynda 5 usynys pen 59 tapsyrma berildi. Onyń ishinde 5 usynys pen 46 tapsyrma tolyq kólemde oryndaldy. Júrgizilgen aýdıtorlyq is-sharalardyń nátıjesimen bıýdjet qarajatyn tıimsiz josparlaý deregine qatysty 2 laýazymdy tulǵaǵa ákimshilik hattama toltyrylyp, materıaldary sotqa joldandy. Ýákiletti organdarǵa shara qoldaný úshin joldanǵan aýdıt materıaldary negizinde 45 ákimshilik is qozǵalyp, jalpy somasy 1 189,0 myń teńge ákimshilik aıyppul salyndy», -dep málim etti Ravıl Tólebaev.
Eske sala ketelik, buǵan deıin Atyraý oblysynda ákimdik esepshisi 18,4 mln teńgeni jymqyrǵanyn habarlaǵan bolatynbyz.
