Atyraý oblysynda 700-ge jýyq medıtsına qyzmetkerine vaktsına egildi

ATYRAÝ. QazAqparat – Atyraý oblysynda 700-ge jýyq medıtsına qyzmetkeri vaktsına aldy, dep habarlaıdy QazAqparat tilshisi.

Oblystyq densaýlyq saqtaý basqarmasy baspasóz qyzmetiniń málimetinshe, 1-4 aqpanda 680 medıtsına qyzmetkerine koronavırýs ınfektsııasyna qarsy vaktsına egilgen. Erikti túrde vaktsına egý kezeń-kezeńmen júrgizilip jatyr.

«Vaktsına alǵannan keıin aýrýhanaǵa túsken jaǵdaı tirkelmedi. Aldymen koronavırýs ınfektsııasyn juqtyrý qaýpi joǵary sanalatyn medıtsına mamandaryna salynyp jatyr.

Naqtylaı aıtqanda, juqpaly aýrýlar aýrýhanalary men jansaqtaý bóliminiń, qarqyndy terapııa bólimsheleriniń dárigerleri, jedel járdem stansasynyń qyzmetkerleri men emhanalardaǵy mamandar alady. Vaktsına qabyldaǵan adamdar úsh kún boıy dárigerdiń baqylaýynda bolady», - deıdi oblystyq densaýlyq saqtaý basqarmasy basshysynyń orynbasary Qaısar Abdalıev.

Qazir óńirde koronavırýs ınfektsııasyna qarsy vaktsına salý úshin 24 oryn ashylǵan.

Sondaı-aq, vaktsınany saqtaýǵa arnalǵan arnaıy muzdatqysh kameralary ornatylǵan.

Eske sala ketelik, budan buryn Atyraýda vaktsınatsııanyń alǵashqy kúni 135 adam ekpe alǵanyn habarlaǵan bolatynbyz.