Atyraý oblysynda 7 myńnan astam adam jumyspen qamtylady
Búgin oblys ákimi Mahambet Dosmuhambetov «Jumyspen qamtýdyń 2020-2021 jyldarǵa arnalǵan jol kartasy» memlekettik baǵdarlamasynyń iske asyrylýy týraly keńes ótkizdi.
«Jumys oryndarynyń keminde 50 paıyzy jumyspen qamtý ortalyqtarynyń joldamalary arqyly jumyssyzdarǵa usynylýy tıis. Osy maqsatta bıyl «Jumyspen qamtýdyń 2020-2021 jyldarǵa arnalǵan jol kartasy» memlekettik baǵdarlamasynyń aıasynda 35 mlrd 308 mln qarajat bólinip otyr», -dedi Mahambet Dosmuhambetov.
Atalǵan baǵdarlama aıasynda tek Atyraý qalasynyń sheńberinde 17 ınfraqurylymdyq joba iske qosylady. Nátıjesinde 2028 jumys orny ashylady. Onyń ishinde, 1043 oryn jumyspen qamtý ortalyǵy arqyly jumyssyzdarǵa usyný kózdelip otyr.
«Buǵan deıingi engizilgen tótenshe jaǵdaı rejımine baılanysty merdiger mekemeler óz jumystaryna endi kiriskeli otyr. Kózdelgen qarajattyń jalpy kóleminiń keminde 90 paıyzyn otandyq óndirýshilerden taýar satyp alýǵa jumsaýdy josparlap otyrmyz», - dedi oblystyq jumyspen qamtýdy úılestirý jáne áleýmettik baǵdarlamalar basqarmasynyń basshysy Serik Qamıdollauly.
Oblys ákimi «Jumyspen qamtýdyń 2020-2021 jyldarǵa arnalǵan jol kartasy» memlekettik baǵdarlamasy aıasynda júzege asýy tıis jumystardy óz deńgeıinde uıymdastyra almaı otyrǵan birqatar jaýapty laýazymdylardy synǵa aldy. Sondaı-aq, turaqty jumys kózderin ashyp, bólingen qarajatty maqsatty jáne ýaqtyly ıgerýdi tapsyrdy.
«Basty maqsat – aımaqtaǵy jumyssyzdyq deńgeıiniń ósýine jol bermeý. Qosymsha jumys oryndaryn ashyp, olardy barynsha turaqty jumys oryndaryna aınaldyrý arqyly ár otbasynyń tabys kózin qamtamasyz etý», -dedi óńir basshysy.
