Atyraý oblysynda 7,3 mlrd teńgeniń múlki memleketke qaıtaryldy
Atyraý oblysynyń prokýrory Baýyrjan Jumaqanovtyń aıtýynsha, prokýrorlardyń azamattardy qabyldaý tıimdiligi artqan. Ótken jylǵy kórsetkishpen salystyrǵanda, jeke qabyldaýǵa jazylǵan azamattardyń sany 67% artty.
«Prokýrorlyq qadaǵalaýdyń basym baǵyty – azamattardyń quqyǵy men bostandyǵyn, bıznesti, sondaı-aq memleket múddesin qorǵaý. Biz osy baǵytta birqatar negizgi kórsetkishter boıynsha oń úrdisti saqtadyq», - deıdi Baýyrjan Jumaqanov.
Onyń deregine súıensek, bıyl asa aýyr qylmystar sany 23,2% azaıdy. Sondaı-aq adam saýdasymen (80%), azaptaýmen (66,7%), ekstremızm jáne terrorızmmen (50%), adam óltirýmen (33,3%), qarjy pıramıdalarymen (20%), densaýlyqqa aýyr zııan keltirýmen (2,1%) baılanysty qylmystar azaıǵan. Buǵan qosa balalarǵa qatysty jynystyq qol suǵý (46,4%), mas kúıde jasalǵan (18,4%) jáne esirtki (3,6%-ǵa) qylmystary azaıǵany baıqalyp otyr.
«Prokýratýra organdarynyń yqpal etý is-sharalarymen 130 myńnan astam azamattyń, onyń ishinde 51 myń balanyń, 600 kásipkerdiń quqyǵy qorǵaldy. Memleketke 400 mln teńgeniń shyǵyny ótelip, 7,3 mlrd teńgeniń múlki qaıtaryldy. Prokýratýranyń úılestirýimen 103 jumysshyǵa 45,2 mln teńgeniń jalaqy bereshegi óteldi», - dep málim etti Baýyrjan Jumaqanov.
Oblys prokýrorynyń aıtýynsha, qadaǵalaý organynyń mindeti – memleket múddesin, azamattardyń konstıtýtsııalyq quqyqtaryn qorǵaý. Prokýratýra zańsyz shyǵarylǵan aktıvterdi qaıtarýǵa, sybaılas jemqorlyqqa, kámeletke tolmaǵandarǵa qarsy jáne ózge de qylmystarǵa «kóleńkeli ekonomıkaǵa», alaıaqtyqqa qarsy úılestirý rólin arttyra beredi.
Eske sala ketelik, budan buryn Atyraý oblysynda bıylǵy 10 aıda qylmys kórsetkishi 6 paıyzǵa óskenin jazǵan edik.
