Atyraý oblysynda 62 medıtsına qyzmetkeri koronavırýs juqtyrǵan
ATYRAÝ. QazAqparat – Atyraý oblysynda koronavırýspen kúreske 1000-nan astam medıtsına qyzmetkeri tartylǵan. Onyń ishinde 62-si qaýipti indetti juqtyrdy, dep habarlaıdy QazAqparat.
Oblystyq densaýlyq saqtaý basqarmasy basshysynyń orynbasary Gúlnafıs Tanbaevanyń málimetine súıensek, 62 medıtsına qyzmetkerinen COVID-19 tabylǵan. Qazir onyń 17-si ınfektsııalyq statsıonarǵa jatqyzylǵan.
Qaýipti indetke shaldyqqandarmen baılanysqan tulǵalar apta saıyn vırýsqa test tapsyrady. Olardyń kúndelikti dene qyzýy ólshenip, tekseriledi. JRVI belgileri paıda bolǵan jaǵdaıda jedel túrde analız alynady.
«Dárigerlerde koronavırýs ınfektsııasyn juqtyrý qaýpi basym. Óıtkeni, COVID-19 indetimen kúreste dárigerler, medbıkeler, kishi býyn medqyzmetkerleri, sanıtarlar, ınfektsıonıst-mamandar alǵy shepte eńbek etip júr. Kópshiligi birneshe aıdan beri jaqyndaryn kórmegen. Bul moraldyq turǵydan óte qıyn. Biz medıtsına qyzmetkerleriniń osyndaı jankeshti eńbegi men kásibine adaldyǵyna alǵys aıtamyz. Qazirgi ýaqytta olarǵa táýligine 6 saǵat jumys isteý úshin aýysymdyq jumys ádisi uıymdastyryldy. Sondaı-aq, olardyń jumystan keıin demalýy úshin barlyq jaǵdaı qarastyrylyp otyr», - deıdi Gúlnafıs Tanbaeva.
Budan buryn Atyraýda Ulttyq saraptama ortalyǵy fılıalynyń dırektory men 13 qyzmetkeri koronavırýs juqtyrǵanyn jazǵan edik.
