Atyraý oblysynda 6 kún buryn joǵalǵan baqtashyny tikushaqpen izdep jatyr
Oblystyq tótenshe jaǵdaılar departamentiniń qoǵammen baılanys tobynan málim etkendeı, 23 mamyrda Jylyoı aýdanynda iz-túzsiz joǵalyp ketken baqtashyny izdeýge tikushaq tartyldy.
«Jylyoı aýdanynyń ortalyǵy Qulsary qalasynan 70 shaqyrym qashyqtaǵy sharýa qojalyǵynyń qystaǵynan jergilikti ýaqytpen saǵat 17:00-de shyqqan 1986 jylǵy baqtashynyń qaı baǵytqa ketkeni belgisiz. Onyń joǵalǵany týraly 24 mamyr kúni saǵat 15:12-de habarlandy. Sodan beri esh habar bolmaı tur. Búgin, 29 mamyrda izdestirý-qutqarý jumystaryna «Qazavıaqutqarý» AQ-nyń MI-8 tikushaǵy jumyldyryldy. Tikushaq bortynda 5 ekıpaj múshesi, tótenshe jaǵdaılar departamentiniń 4 qyzmetkeri men týysqany bar», - dep habarlady deparatmenttiń qoǵammen baılanys toby.
Shaqyrtý túsken kúni baqtashyny izdeýge oblystyq tótenshe jaǵdaılar departamentinen 5 qyzmetker men 1 tehnıka tartylǵan. Qutqarýshylarǵa kómekke Jylyoı aýdandyq polıtsııa bóliminiń qyzmetkerleri men týysqandary qosylǵan.
Sondaı-aq, Qurmanǵazy aýdanynan 120 shaqyrym qashyqtyqta ornalasqan Qoshalaq eldi mekenindegi «Temirjanov» sharýa qojalyǵynan mal izdeýge shyqqan er adam izdestirilip jatyr.
Bıyl 60 jasqa tolatyn baqtashy 26 mamyr kúni saǵat 14:00 shamasynda shyǵyp ketip, qaıta oralmaǵan. Ony izdestirý-qutqarý jumystaryna oblystyq tótenshe jaǵdaılar departamentinen 4 qyzmetker men 1 tehnıka shyqqan.
Eske sala ketelik, buǵan deıin Atyraý oblysynda iz-túzsiz ketken malshy izdestirilip jatqanyn habarlaǵan bolatynbyz.
