Atyraý oblysynda 6 aıda esirtkige baılanysty 63 qylmys tirkeldi
Bul týraly oblys ákimi Serik Shápkenov ótkizgen quqyqbuzýshylyq profılaktıkasy jáne sybaılas jemqorlyqqa qarsy is-qımyl máseleleri jónindegi vedomstvoaralyq komıssııanyń otyrysynda málim boldy.
Polıtsııa departamenti esirtki bıznesine qarsy is-qımyl basqarmasynyń bastyǵy Álisher Nurshaevtyń aıtýynsha, esirtki quraldarynyń túri kóbeıgen.
«Bıyl «Tramadol» preparaty esirtki tizimine engizilgenimen, onyń ornyna dárihanalyq nashaqorlyqqa jatatyn preparattardyń basqa túrleri taralyp otyr. Máselen, pregabalın preparatynyń «Alıs», «Lırıka» sekildi balama túrleri shyqty. Analıtıkalyq málimetterge sáıkes oblysta bıylǵy 6 aıda esirtkimen baılanysty 63 qylmystyq quqyqbuzýshylyq tirkeldi. Onyń ishinde aýyr jáne asa aýyr qylmystar sany – 35. Bul qylmystardyń 2-eýin kámeletke tolmaǵandar jasaǵany anyqtaldy. Zańsyz aınalymnan jalpy salmaǵy 5 keli 966,41 gramm esirtki zattary tárkilendi», -dep habarlady Álisher Nurshaev.
Oblys ákimi Serik Shápkenovtiń pikirinshe, polıtsııa qyzmetkerleri túrli qylmystyń aldyn alý úshin arnaıy is-shara ázirleýi qajet.
«Másele kóshelerge beınekamera ne jaryq shamdaryn ornatýmen sheshilmeıdi. Qylmysqa qarsy kúrestiń nátıjesi kórinýge tıis. Qazir qylmys túri kóbeıip jatyr. Oǵan tótep berý úshin mamandar daıyndaıyq. Olardy oqytyp, qajetti qural-jabdyqtarmen de qamtamasyz eteıik. Biraq qolǵa alynǵan isterdiń naqty nátıjesi bola ma? Eger nátıje bolmasa, kadrlyq ózgeris engizýdi nemese basqa da jolyn izdeýimiz kerek», - dep málim etti Serik Shápkenov.
Eske sala ketelik, budan buryn Atyraý oblysynda kıberpolıtseıler jumysqa kiriskenin habarlaǵan bolatynbyz.
