Atyraý oblysynda 52 mln teńgeniń munaıy urlanǵan

ATYRAÝ. QazAqparat - Atyraý oblysynda bıyl 14 munaı urlaý faktisi anyqtaldy, dep habarlaıdy QazAqparat tilshisi oblystyq prokýratýranyń baspasóz qyzmetine silteme jasap.

Bul aqparat Atyraý oblystyq prokýratýrasynda óńirdegi zańdylyqty, quqyqtyq tártipti jáne qylmysqa qarsy kúresti qamtamasyz etý jónindegi Úılestirý keńesinde aıtyldy.

Statıstıkalyq málimetterge sáıkes, 2017 jyly munaı jáne munaı ónimderin jymqyrý, sondaı-aq olardy zańsyz saqtaý, tasymaldaý jáne satýmen baılanysty 35 qylmys tirkelgen. Onyń 18-i sotqa joldanǵan.

Bıyl 6 aıdyń ishinde osy sanattaǵy qylmystardyń 14 faktisi tirkelip, onyń beseýi sotqa joldanǵan. Anyqtalǵan qylmystar boıynsha 52 mıllıon teńge zalal keltirilgen.