Atyraý oblysynda 5 sport nysany paıdalanýǵa berildi
ATYRAÝ. QazAqparat – Atyraý oblysynda bıyl 5 sport nysany paıdalanýǵa berildi, dep habarlaıdy QazAqparat.
Oblystyq dene shynyqtyrý jáne sport basqarmasynyń basshysy Rınat Ibragımovtyń málim etýinshe, qazir qoldanysta 1 107 sporttyq nysan bar. Bıyl munyń qataryna 5 sport nysany qosylyp otyr.
«Qazirgi jaǵdaıǵa baılanysty kóptegen sporttyq sharalar keıinge shegerildi. Soǵan qaramastan, bizdiń sportshylarymyz salaýatty ómir saltyn nasıhattap keledi. Olar Tótenshe jaǵdaı kezinde «Úıde bol» chellendjin qoldap, óz úıinde jasaǵan jattyǵý jumystarymen bólisýdi qolǵa aldy. Jattyqtyrýshylar sportshylardyń úı jaǵdaıynda jattyǵýyna arnaıy baǵdarlama jasap, jańa onlaın rejımde jumys jasaýda. Odan bólek, 50-den astam sportshy tikeleı efırge shyǵyp, onlaın sabaqtar júrgizdi», - deıdi Rınat Ibragımov.
Onyń aıtýynsha, bıyl Qyzylqoǵa aýdany men Atyraý qalasynda fýtbol alańy paıdalanýǵa berilgen. Sondaı-aq, oblys ortalyǵyndaǵy Nursaıa yqshamaýdanynda jeke ıeliktegi «Tonykók» kópbeıindi sport kesheni ashylǵan. Óńirde sporttyq-materıaldyq bazanyń nyǵaıýy dene shynyqtyrý jáne sportpen aınalysýshylar sanynyń ósýine oń áserin tıgizip otyr. Máselen, dene tárbıesimen, sportpen turaqty túrde shuǵyldanatyn atyraýlyqtardyń sany 509-ǵa artyp, bıylǵy birinshi jarty jyldyqta 216 myń adamǵa jetti.
