Atyraý oblysynda 5 kanal paıdalanýǵa beriledi
ATYRAÝ. QazAqparat – Bıyl Atyraý oblysynda bes sýarý-sýlandyrý júıesiniń qurylysy jumystary aıaqtalyp, paıdalanýǵa beriledi, dep habarlaıdy QazAqparat.
«Qazsýshar» RMK Atyraý fılıalynyń dırektory Aslanbek Rysjanovtyń aıtýynsha, atalǵan kásiporynǵa qarasty 14 sýarý-sýlandyrý júıesi kommýnaldyq menshikke ótken.
Mahambet aýdanyndaǵy Alǵa-Egiz, Sary-Ózek, Qursaı, 7 Aýyl-Aısary, Inder aýdanyndaǵy Alǵabas-Joryq kanaldaryna kúrdeli jóndeý jumystary júrgizilip jatyr.
«Qazir atalǵan nysandardaǵy qurylys jumysy aıaqtalýǵa jaqyn. Kanaldar jyl aıaǵyna
deıin paıdalanýǵa beriledi. Jasaqtalǵan jobaǵa sáıkes kanaldardyń bitelgen arnalary
arshyldy. Kanal joldary topyraqpen kóterilip, bekitildi. Eski júzbeli nasos stansalar, transformatorlar jańasyna aýystyryldy. Sondaı-aq, kanal boıyndaǵy sý rettegish gıdrotehnıkalyq qurylystar kúrdeli jóndeýden ótkizildi. Keıbireýi jańadan salyndy.
Kúrdeli jóndeýden ótkizilgen kanaldarda sý berý burynǵy jyldarmen salystyrǵanda biraz jaqsardy. Aýyl sharýashylyǵy taýarlaryn óndirýshilerdiń suranysyna sáıkes, sý úzdiksiz berilýde. Al nysandardyń qurylysyn tolyqtaı bitirý 2021 jyldyń aıaǵyna josparlanyp otyr», - deıdi «Qazsýshar» RMK Atyraý fılıalynyń dırektory Aslanbek Rysjanov.
Eske sala ketelik, buǵan deıin Atyraý oblysyndaǵy kanalda balyq qyrylǵany týraly habarlanǵan bolatyn .
