Atyraý oblysynda 5 qabatty turǵyn úıden órt shyǵyp, 6 adam qutqaryldy
Baspasóz qyzmetiniń málimetterine qaraǵanda, 2023 jylǵy 24 qańtarda saǵat 17:24-te Atyraý qalasynda 5 qabatty turǵyn úıden órt shyqqany týraly shaqyrý kelip túsken.
Órt sóndirý bólimsheleri kelgennen keıin 2-qabattaǵy páter janyp jatqany anyqtaldy. 30 sharshy metr alańda jatyn jáne as úı bólmeleri, jıhaz jáne turmystyq tehnıka órtendi.
Atyraý oblystyq Tótenshe jaǵdaılar departamentiniń órt sóndirýshileri avtosatynyń kómegimen jáne baspaldaqpen 5-qabattan 6 adamdy, onyń ishinde 4 balany qutqardy.
«Syrtqy baqylaýshy úshin munyń bári óte qarapaıym kórinedi. Shyndyǵynda, kózge kórinbeıtin kóptegen qıyndyqtar bar. Mundaǵy basty mindet - avtosatyny bıiktiktegi qajetti núktege jyldam, naqty jáne dál qoıý. Bul jerde avtosaty operatorynyń jumysy úlken ról atqarady jáne bul jaǵdaıda ol óte jaqsy jumys istedi. Nátıjesinde 6 adam órtten qutqaryldy»,-delingen habarlamada.
Órt saldarynan kúıik alǵan 1969 jyly týǵan páter ıesi men 1964 jyly týǵan áıel oblystyq aýrýhanaǵa jatqyzyldy (dene kúıikteri naqtylanýda).
Órt saǵat 17:44-te sóndirildi.
Atyraý oblysy TJD kúshteri kórshi páterlerge órttiń taralýynyń aldyn aldy. Órttiń sebebi anyqtalýda.
Órtti sóndirýge Atyraý oblysy TJD 8 qyzmetkeri men 3 birlik tehnıkasy jumyldyryldy.
«Qurmetti Atyraý oblysynyń turǵyndary men qonaqtary! Atyraý oblysynyń Tótenshe jaǵdaılar departamenti Órt qaýipsizdigi erejelerin qatań saqtaýǵa shaqyrady! Turmystyq tehnıka men elektr quraldaryn qosýly qaldyrmańyz! Saq bolyńyz!»,dep eskertý jasady Atyraý oblysy TJD baspasóz qyzmeti.
Foto: gov.kz
