Atyraý oblysynda 5 aıda qyzylsha juqtyrýdyń 202 deregi tirkeldi
Atyraý oblysynyń sanıtarııalyq-epıdemıologııalyq baqylaý departamentiniń bas mamany Gúldana Bısenbaıqyzynyń aıtýynsha, qyzylsha juqtyrýdyń alǵashqy deregi 2 naýryzda anyqtalǵan.
«Bıylǵy 2 naýryz ben 25 shilde aralyǵynda alǵashqy dıagnozy boıynsha qyzylsha juqtyrý kúdigimen 285 jaǵdaı tirkeldi. Onyń ishinde Atyraý qalasynda – 268, Jylyoı aýdanynda – 7, Qurmanǵazyda – 6, Mahambette – 3, Qyzylqoǵa aýdanynda 1 derek anyqtalyp otyr. Atalǵan dertti juqtyrýdyń 202 deregi zerthanalyq taldaý jolymen dáleldendi. Al, 64 jaǵdaıdyń zerthanalyq tekserý qorytyndysy teris nátıje berdi. Qazir 19 synama áli zerttelip jatyr», -dep habarlady Gúldana Bısenbaıqyzy.
Onyń aıtýynsha, Atyraý oblysynda 2019 jyly qyzylsha aýrýyn juqtyrý órship, 774 derek tirkelgen.
«Bul aýrýdyń aldyn alýdyń bir joly – vaktsına saldyrý. Sol sebepten, derttiń taralýyn boldyrmaý, ári aldyn alý maqsatynda 9 aılyq náresteler men 20-29 jastaǵy adamdar arasynda qyzylshaǵa qarsy qosymsha ımmýndaý jumystary júrgizildi. Sonyń nátıjesinde qyzylsha aýrýy 7,6 esege tómendedi», -dep málim etti Gúldana Bısenbaıqyzy.
Eske sala ketelik, buǵan deıin Atyraý oblysynda sońǵy tórt jylda alǵash ret qyzylsha juqtyrǵandar tirkelgenin jazǵan bolatynbyz.
Atyraý oblystyq sanıtarııalyq-epıdemıologııalyq baqylaý departamentiniń bólim basshysy Aınagúl Sársenǵalıevanyń aıtýynsha, bıylǵy naýryz aıynda atalǵan aýrýdyń 4 jaǵdaıy tirkelip otyr.
Alǵashqy jaǵdaı shet elden kelgen jasóspirimnen anyqtalǵan. Túrkııa elinen kelgen azamattyń balasy vırýsty sol jaqtan juqtyryp kelgen. Qyzylsha juqtyrǵan 4 jaǵdaıdyń bireýi zerthanalyq taldaýmen dáleldengen.
