Atyraý oblysynda 5 adam mert bolǵan jol apatyna kináli júrgizýshi sottaldy
Atyraý oblysynyń Jylyoı aýdandyq sotynda QR Qylmystyq kodeksi 345-babynyń 4-bóligimen aıyptalǵan júrgizýshi S.-ǵa qatysty qylmystyq is qaraldy. Júrgizýshi jasaǵan jol apatynan 5 adam mert bolǵan.
«2022 jylǵy 14 qańtarda saǵat 10:20 shamasynda S. «Honda Odyssey» markaly avtokóligin júrgizip kele jatyp, «Vaz-211540» markaly avtokóligimen soqtyǵysqan. Jol-kólik oqıǵasy saldarynan «Vaz 211540» markaly avtokóligindegi júrgizýshi men 3 jolaýshy, «HondaOdyssey» markaly avtokóligindegi 1 jolaýshy qaza bolǵan. Sottalýshynyń kinási sot-medıtsınalyq saraptama qorytyndylarymen, kýálardyń aıǵaqtarymen tolyq dálelin tapty», - dep habarlady Jylyoı aýdandyq sotynyń baspasóz qyzmeti.
Prokýror sottalýshyǵa 9 jyl merzimge bas bostandyǵynan aıyrý jazasyn taǵaıyndaýdy surady. Al, eki jábirlenýshiniń ókili zań talaptaryna saı jaza qoldanýdy usynǵan. Taǵy eki jábirlenýshiniń ókili talaby joq ekenin málimdedi. Sottalýshy óz kinásin moıyndaǵan joq.
«Sot úkimimen S. QR Qylmystyq kodeksi 345-babynyń 4-bóligimen kináli dep tanyldy. Sottalýshyǵa 7 jyl merzimge kólik quraldaryn basqarý quqyǵynan, 5 jyl merzimge bas bostandyǵynan aıyrý jazasy taǵaıyndaldy», - dep málim etti sottyń baspasóz qyzmetinen.
Sot úkimi zańdy kúshine engen joq.
Eske sala ketelik, buǵan deıin Atyraý oblysynda eki kólik soqtyǵysyp, 5 adam mert bolǵanyn habarlaǵan edik.
