Atyraý oblysynda 5 adam eki eldiń azamattyǵymen júrgen
ATYRAÝ. QazAqparat – Atyraý oblysynda 5 adam eki eldiń azamattyǵymen júrgen, dep habarlaıdy QazAqparat.
Oblystyq polıtsııa departamentiniń bastyǵy, polıtsııa polkovnıgi Nurhat Orazbaevtyń aıtýynsha, kóshi-qon qyzmeti basqarmasynyń qyzmetkerleri qos eldiń azamattyǵy bar 5 adamdy anyqtaǵan.
«Atalǵan adamdarda Qazaqstan Respýblıkasynyń azamattyǵy bolǵan. Oǵan qosa Reseı Federatsııasynyń azamattyǵyn qabyldaǵany anyqtaldy. Osyǵan baılanysty olarǵa qatysty QR Ákimshilik quqyqbuzýshylyq týraly kodeksiniń 496-babynyń 2-bólimimen ákimshilik hattamalar toltyryldy. Sot sheshimimen olarǵa 200 aılyq eseptik kórsetkish mólsherinde ákimshilik aıyppul salyndy», -dep málim etti Nurhat Orazbaev.
Onyń málimetinshe, byltyr 33 adamnyń qos azamattyqpen júrgeni belgili bolǵan. Sot sheshimimen 9 adam elimizdiń aýmaǵynan tysqary shyǵarylǵan. Al, 24 adamǵa 200 aılyq eseptik kórsetkish mólsherinde ákimshilik aıyppul jazasy taǵaıyndalǵan.
Eske sala ketelik, buǵan deıin Atyraýda úsh kólikten 100 keliden astam bekire tuqymdas balyq tabylǵanyn jazǵan bolatynbyz.
