Atyraý oblysynda 47 adamnyń sýshıden ýlanýy: Dámhana jumysy toqtatyldy
ATYRAÝ. QazAqparat –Atyraý oblysynda sýshıden ýlanǵandardan salmonellez qozdyrǵyshy anyqtaldy, dámhana jumysy toqtatyldy, dep habarlaıdy QazAqparat.
Oblystyq Sanıtarııalyq-epıdemıologııalyq baqylaý departamenti baspasóz qyzmetiniń málimetinshe, 2020 jylǵy 28 jeltoqsan men bıylǵy 3 qańtar aralyǵynda Jylyoı aýdandyq ortalyq aýrýhanasynyń juqpaly aýrýlar bólimine «Taǵamdyq toksıkoınfektsııa» dıagnozymen 47 naýqas túsken. Naýqastardyń «Trı samýraıa» dámhanasynan tapsyryspen sýshı alyp jegeni anyqtalǵan.
«Jylyoı aýdandyq sanıtarııalyq-epıdemıologııalyq baqylaý basqarmasynyń mamandary «Trı samýraıa» dámhanasyn tekserý kezinde birqatar buzýshylyqty anyqtady.
Balyq, balyq ónimderin, kremder men soýstardy, nan-bólkelerdi qabyldaý, saqtaý, qadaǵalaý men qaýipsizdigin kýálandyratyn ilespe qujattama bolmaǵan.
Bólshekteý taqtaıshalary men pyshaqtar óńdeletin ónimderge sáıkes tańbalanbaǵan. Tamaq ónimderin saqtaý kezinde temperatýralyq ylǵaldylyqty qadaǵalap otyrý úshin tońazytqysh úı-jaılary, tamaq qoımasy arnaıy termometr, psıhrometr qurylǵylarymen qamtylmaǵan. Tamaq ónimderin saqtaý kezinde muzdatqyshtarda shıki balyq ónimderi men kýyrylǵan balyq ónimderi, nan-bólke, frı, ıkra birge saqtalǵan. Balyq jáne balyq ónimderi, pıtstsa ashytqysy saqtalatyn tońazytqysh jabdyqtarynyń temperatýralary ólshenbegen, temperatýralyq rejımge qadaǵalaý júrgizilmegen, tońazytqysh jabdyqtary jetkiliksiz.
Sondaı-aq kúndelikti jumys aýysymynyń bastalýy aldynda jumyskerlerdiń denesiniń ashyq betin irińdi aýrýlardyń, shaǵyn jaraqattardyń bolýyna tekserý júrgizilmegen.
Sanıtarııalyq jýrnal júrgizilmegen. Personaldarǵa arnalǵan qol jýǵysh ornatylmaǵan» - dep habarlady departamenttiń baspasóz qyzmetinen.
Bakterıologııalyq zertteý qorytyndysymen naýqastardan salmonellez qozdyrǵyshy anyqtaldy. Sondaı-aq, sýshı taǵamynyń quramyna qosylatyn krab taıaqshasy men soýstan alynǵan synamalarda sáıkessizdikter kezdesken.
Qazir «Trı samýraıa» dámhanasy jabylǵan.
«Oqıǵa boıynsha «Sanıtarlyq erejeler men gıgıena normalaryn buzý» baby boıynsha qylmystyq is qozǵaldy», - dep tolyqtyrdy vedomstvodan.
Eske sala ketelik, budan buryn Atyraý oblysynda sýshıden 43 adam ýlanǵanyn habarlaǵan bolatynbyz.
