Atyraý oblysynda 4500 adamdy jumyspen qamtıtyn eki iri zaýyt salynady
Atyraý oblysy ákiminiń orynbasary Jasulan Bısembıevtiń málimetinshe, onyń biri – býtadıen, kkinshisi – gaz óńdeý zaýyty.
«Býtadıen zaýyty reseılik seriktes kompanııanyń qatysýymen salynady. Bul zaýytta shına óndirisine qajetti kaýchýk ónimderi óndiriledi. Jobanyń quny 800 mln AQSh dollaryna baǵalanyp otyr. Jańa zaýytta 2500-den astam jumys orny qurylady. Joba qurylysy kelesi jyly bastalyp, 2026 jyly qoldanysqa beriledi», -dep habarlady Jasulan Bısembıev.
Onyń atstýynsha, gaz óńdeý zaýyty qurylysyn bıyl bastaý kózdelip otyr. Shetel ınvestorlarymen birlesken jobanyń quny 500 mln AQSh dollaryn quraıdy. Zaýyt qurylysynda 2 myńnan astam jumys ashylatyny josparlanǵan.
«Atalǵan iri ınvestıtsııalyq jobalar Atyraý oblysynyń ekonomıkalyq, óndiristik qýatyn arttyrady. Óńirdiń áleýmettik ahýalynyń jaqsarýyna yqpal etedi. Sol sebepten, eki iri zaýyttyń qurylysyna «Teńiz» ken ornyndaǵy keleshek keńeıtý jobasynyń aıaqtalýyna baılanysty jumystan bosatylǵan jumysshylardy tartý máselesin qarastyrylyp otyr», -dep málim etti Jasulan Bısembıev.
Eske sala ketelik, buǵan deıin Teńiz ken ornynda 6 myńnan astam adam jumystan bosatylatynyn habarlaǵan bolatynbyz.
«Teńizshevroıl» JShS kúrdeli jobalar jónindegi bas menedjerdiń orynbasary Erbol Jumaǵazıevtiń deregine qaraǵanda Teńiz jobasyndaǵy qyzmetkerlerdi josparly bosatý jumys kóleminiń aıaqtalýyna qaraı júzege asyrylady.
Máselen, byltyrǵy qarasha-jeltoqsan aılaryna jasalǵan boljamǵa sáıkes 6 159 adam jumystan bosatý kózdelgen.
