Atyraý oblysynda 400-den astam reseılik kásipker retinde tirkelgen
Oblystyq kásipkerlik jáne týrızm basqarmasy syrtqy ekonomıkalyq qatynastar bóliminiń basshysy Erlan Qazbekovtiń málimetinshe, Atyraý oblysy men Reseı Federatsııasynyń arasynda taýar aınalymynyń kólemi artqan.
«Qazir munaıly óńir 50-den astam elmen áriptestik, ekonomıkalyq jáne saýda baılanysyn ornatqan. Sol elderdiń qatarynda Reseı Federatsııasy da bar. Bıyl Reseımen aradaǵy taýar aınalymy 5 paıyzǵa artyp, 6 aıda ımport pen eksport kólemi 183 mln AQSh dollaryna jetti», - dep habarlady Erlan Qazbekov.
Onyń aıtýynsha, Atyraý oblysyna reseılik taýardyń basym bóligi Astrahan qalasynan ákelinedi. Azyq-túlik, onyń ishinde konservanttar, maı, un ónimderi tasymaldanady. Qurylys materıaldary da Reseı Federatsııasynan ákelinedi. Al, Atyraýdan kórshi memleketke munaı ónimderi, metall jáne metall qaldyǵy eksporttalady.
«Sońǵy kezde Atyraý oblysynda reseılik kompanııalardyń sany arta tústi. Máselen, jyl basynan beri Reseıden 127 bıznes ıesi keldi. Bulardyń qatarynda kásibiniń jergilikti jerdegi fılıalyn ashqandar men túbegeıli qonys aýdarǵandar bar. Reseı kásipkerleri kóbine kólik salasy, IT tehnologııa, kóterme saýda jáne munaı salasyn damytýǵa úles qosyp jatyr. Osy kezge óńirde reseılik 400-den astam azamat óz bıznesin tirkedi», - deıdi Erlan Qazbekov.
Bıyl Atyraý men Astrahan oblystary arasynda densaýlyq saqtaý, bilim jáne ǵylym, ónerkásip, kásipkerlik, týrızm jáne mádenıet salalaryndaǵy yntymaqtastyq jónindegi 2022-2026 jyldarǵa arnalǵan is-sharalar josparyna qol qoıý josparlanyp otyr. Al, jaqynda óndiristik nysandar men turǵyn úıler úshin sý tazartýdy iske asyrý maqsatynda birlesken kelisim jasalǵan.
Eske sala ketelik, budan buryn Qazaqstan men Reseı órt sóndirýshileri birlesken jattyǵý ótkizgenin jazǵan bolatynbyz.
