Atyraý oblysynda 38 myńnan astam abonent jaryqsyz qaldy
ATYRAÝ. QazAqparat – Atyraý oblysynda 38 myńnan astam abonent jaryqsyz qaldy, dep habarlaıdy QazAqparat.
Oblystyq tótenshe jaǵdaılar departamentiniń baspasóz qyzmetinen málim etkendeı, keshe, 5 naýryzda Qurmanǵazy aýdanyndaǵy elektr energııasy óship qalǵan.
«Qurmanǵazy aýdanynda 5 naýryzda ekpini sekýndyna 22-23 metrge jetken qatty jel soqty. Aýa raıynyń nasharlaýynan saǵat 03:10-da Qurmanǵazy, Orly, Shortanbaı, Nurjaý, Jańatalap, Qıǵash, Birlik, Aqkól, Maqash, Dyńǵyzyl, Teńiz, Safon, Baıda, Kóptoǵaı, Eńbekshil, Kýdrıashov kentterinde elektr energııasy avarııalyq aqaýdyń saldarynan óship qaldy. Osyǵan baılanysty atalǵan aýyldarda 52 907 abonent jaryqsyz qaldy. «Atyraý Jaryq» AQ qyzmetkerlerinen quralǵan 10 avarııalyq brıgada jóndeý-qalpyna keltirý jumysyn júrgizip jatyr. Oǵan tehnıka tartyldy», -dep habarlady departamenttiń baspasóz qyzmeti.
Al, búgin 6 naýryzda saǵat 11:30-da Orly, Shortanbaı jáne Qurmanǵazy kentteriniń elektr energııasy qosyldy.
Qalǵan eldi mekenderde 38 333 abonent jaryqsyz otyr.
Elektr jelisindegi aqaýdy qalpyna keltirý jumystary jalǵasyp jatyr.
