Atyraý oblysynda 36 jel qondyrǵysy ornatylady
ATYRAÝ. QazAqparat - Atyraý oblysynyń Isataı aýdanynda alǵashqy Jel elektr stansasy salynyp jatyr. Qýaty 52 mVt bolatyn stansa 2020 jyly paıdalanýǵa beriledi, dep habarlaıdy «QazAqparat» HAA tilshisi Óńirlik kommýnıkatsııalar qyzmetine silteme jasap.
«Elektr stansasynyń qurylysy jańartylatyn elektr energııasy kózderin qurý baǵdarlamasy aıasynda júrip jatyr. Joba boıynsha jel qondyrǵylary ornatylyp, keıin «Atyraýjaryq» AQ jelilerine jalǵanatyn eki shaǵyn stansa salynady. Oǵan «JelElektrtehnologııalary» JShS bastamashyl boldy. Joba quny 12,3 mlrd teńgeni quraıdy. Tapsyrý merzimi - 2020 jyl. Stansa Atyraý oblysynda alynatyn barlyq elektr energııasynyń shamamen 13-14%-yn beredi», - deıdi oblystyq energetıka jáne turǵyn úı kommýnaldyq sharýashylyq basqarmasynyń basshysy Jumabaı Qaraǵaev.
Stansa Kaspıı teńizi jaǵalaýyndaǵy Manash degen jerde salynyp jatyr. Zertteýlerge qaraǵanda, bul jerde jıi jel soǵady, onyń ortasha jyldamdyǵy sekýndyna 10-12 metrge jetedi. Elektr stansasynyń úzilissiz jumys isteýi úshin jeldiń jyldamdyǵy 4 m/s bolsa jetkilikti. Jalpy 36 jel qondyrǵysyn ornatý josparlanǵan. Qazirge deıin sonyń jeteýi montajdaldy. Onyń árqaısysynyń salmaǵy 230 tonnany, al bıiktigi 100 metrdi quraıdy.
