Atyraý oblysynda 35 myń bıznes nysandy qyz-kelinshekter basqaryp otyr
Oblystyq kásipkerlik jáne týrızm basqarmasy basshysynyń mindetin atqarýshy Sáttiǵul Sabyrovtyń deregine súıensek, bıylǵy 1 aqpanda 70 717 kásipkerlik sýbektisi tirkelgen.
«Atyraý oblysynda jyl saıyn kásipkerlik sýbektileriniń sany artyp keledi. Byltyr shaǵyn jáne orta bıznes ıeleri úlesi óńirdegi jalpy ishki ónimniń 22,7%-yn qurady. Al, bıylǵy 1 aqpanda kásipkerlikpen aınalysýshylardyń qatary 70 717-ge jetip otyr. Onyń ishinde 35 myń nysandy qyz-kelinshekter basqarady. Kásipkerlikke bet burǵan áıelder tarapynan memlekettik baǵdarlamalar qatysý bedsendiligi baıqalyp otyr», -dep habarlady Sáttiǵul Sabyrov.
Onyń málimetinshe, byltyr 600 áıel kásipkerdiń jobasy qarjylandyrylǵan.
Sondaı-aq, óz kásibin ashýǵa nıet bildirgen 37 kásipkerge 106 mln teńgege qaıtarymsyz grant usynylǵan.
Onyń 24-i – áıelder. Olar jańadan 30 jumys ornyn ashqan.
«Áıelder basqaratyn kásipkerlik sýbektileri negizinen bilim berý, densaýlyq saqtaý, jeńil ónerkásip salalaryna baǵyttalǵan. Olar osy jáne basqa da salalardy damytý úshin memlekettiń tarapynan qoldaý kórip otyr.
Eske sala ketelik, budan buryn Atyraý oblysynda 3 mlrd teńgelik jańa jylyjaıdyń birinshi kezeńi ashylǵanyn habarlaǵan bolatynbyz.
Jańa jylyjaı Mahambet aýdanyndaǵy Aqjaıyq aýyldyq okrýginde ornalasqan. Onyń aýmaǵy – 4 gektar. Jylyna 1600 tonna ónim jınalady.
Jylyjaıda kesheninde 60-tan astam adam jumys isteıdi. Onyń ishinde 40-tan astam jergilikti turǵyn bar.
