Atyraý oblysynda 337 jumysshynyń 59 mln teńge jalaqy bereshegi óteldi
Atyraý oblystyq memlekettik eńbek ınspektsııa basqarmasynyń basshysy Igilik Áýbákirov aıtýynsha, eńbek qaýipsizdiginiń saqtalýyn qamtamasyz etý úshin 12 mekemege «Senim» sertıfıkaty berilgen. Al, 122 kásiporynda eńbek qaýipsizdigi jáne eńbekti qorǵaý jóninde óndiristik keńester qurylǵan.
«Eńbek daýlaryn sheshý maqsatynda qabyldanǵan tıisti is-sharalardyń nátıjesinde 23 jumys jaǵdaıy, onyń ishinde oblystyń 14 kásipornynda eńbekaqyny kóterý máselesi sheshimin tapty. Al, 26 kásiporynda jumys isteıtin 337 jumysshynyń 59,4 mln teńge jalaqy bereshegi óteldi», -deıdi Igilik Áýbákirov.
Onyń aıtýyna qaraǵanda, byltyr sheteldik jumys kúshin tartatyn 61 kásiporynda jospardan tys tekserý júrgizilgen. Nátıjesinde 23 qazaqstandyq jumysshynyń eńbekaqysyn tómendetilgeni, 33 sheteldik mamannyń berilgen ruqsatqa sáıkes kelmeıtin laýazymda qyzmet atqarǵany, 59 sheteldik biliktiligi atqaryp otyrǵan laýazymyna sáıkes kelmeıtini anyqtalǵan. Sondaı-aq, qazaqstandyq jáne sheteldik jumys kúshi sanynyń araqatynasyna qatysty 72, eńbekti qorǵaý jáne eńbek qaýipsizdiginiń saqtalmaýyna baılanysty 33, halyqty jumyspen qamtý zańnamasyn buzǵan 14 derekteri anyqtalǵan.
«Oblysta eńbek janjaldary oryn alýy yqtımal 25 kásiporynda tıisti sharalar qoldanylyp, 18 kásiporynda bul másele jumysshylardyń paıdasyna sheshildi. Al, 7 kásiporynǵa tıisti jumystar atqarylyp jatyr. Eńbek janjaldaryn boldyrmaý, onyń ishinde jalaqyny kóterý, merziminen keshiktirmeý, mindetti áleýmettik aýdarymdardy tóleý, óndiristik jaraqattardyń aldyn alý máseleleri 12 márte óńirlik úsh jaqty komıssııa otyrysynda qaraldy. Komıssııada 90 kásiporyn basshysy shaqyryldy», -dep málim etti Igilik Áýbákirov.
Eske sala ketelik, budan buryn Atyraý oblysynda jumysshylarǵa 198,8 mln teńge jalaqy bereshege ótelgenin habarlaǵan edik.