Atyraý oblysynda 300-ge jýyq medıtsına qyzmetkeri jetispeıdi

ATYRAÝ. QazAqparat – Atyraý oblysynda 300-ge jýyq medıtsına qyzmetkeri jetispeıdi. Onyń ishinde 183 dárigerdiń orny bos tur. Bul týraly Densaýlyq saqtaý mınıstri Ajar Ǵınııat atyraýlyqtarmen kezdesýde málim etti, dep habarlaıdy QazAqparat tilshisi.

Mınıstrdiń aıtýynsha, qazir aýyldaǵy densaýlyq saqtaý salasyn jańǵyrtý jónindegi ulttyq baǵdarlama iske asyrylyp jatyr. Baǵdarlama sheńberinde Atyraý oblysynda 2023-2024 jyldary 18 alǵashqy medıtsınalyq-sanıtarııalyq kómek nysanyn, onyń ishinde 11 medıtsınalyq, 6 feldsherlik-akýsherlik pýnkt, 1 dárigerlik ambýlatorııa salý josparlanyp otyr. Aýdandyq aýrýhanalarda qosymsha bólimsheler ashylyp, medıtsınalyq jabdyqtarmen jaraqtandyrý josparlanǵan.

«Jyl basynda ákimdik Atyraý oblysynda 280-nen astam medıtsına mamany, onyń ishinde 183 dáriger jetispeıtini týraly málimet berdi. Ásirese, akýsher-gınekologtarǵa asa qajettilik bar. Sol sebepten, óńirge kadrlardy tartý maqsatynda 2022-2023 oqý jylyna rezıdentýrada mamandar daıarlaýǵa 24 oryn berildi. Onyń ishinde eki akýsher-gınekolog mamany daıarlanady», - dep málim etti Ajar Ǵınııat.

Vedomstvo basshysynyń deregine súıensek, Atyraý oblysynda qan aınalymy júıesi aýrýlary, onyń ishinde ınfarkt, ınsýlt túrimen syrqattanýshylardyń kóptigi baıqalyp otyr.

«Óńirde medıtsınalyq-sanıtarııalyq alǵashqy kómekti uıymdastyrýdaǵy kemshiliktiń saldary úıde bolatyn ólim-jitimge sebep bolady. Insýlttan keıin «D» esebine alynǵan adamdardyń tómen úlesi 42,4% qurap otyr. Al onkologııalyq dıspanserde kadr tapshylyǵy bar. Munda tsıtopatomorfologtar, hımıoterapevter, medıtsınalyq fızıkter, torokaldy onkologtar men onkoýrologtar sekildi arnaıy mamandar jetispeıdi», - dep málim etti Ajar Ǵınııat.

Eske sala ketelik, budan buryn Atyraý oblysynda 31 orta mektepte dırektordyń orny bos turǵanyn habarlaǵan edik.