Atyraý oblysynda 26 jyldan beri qujatsyz júrgen aýyl turǵyny jeke kýálik aldy
ATYRAÝ. QazAqparat – Atyraý oblysynyń turǵyny 26 jyldan keıin jeke kýálik aldy, dep habarlaıdy QazAqparat.
Jylyoı aýdanynyń ortalyǵy – Qulsary qalasynda turatyn Edýard Tarasov 1995 jyldan beri jeke basyn kýálandyratyn qujatsyz júrgen.
Óıtkeni, 53 jastaǵy er adam 26 jyl buryn jeke kýáligin joǵaltyp, keıin ony qaıta jasatýǵa tyryspaǵan.
«Men Atyraý oblysy Qulsary qalasynyń turǵynymyn. Budan 26 jyl buryn kýáligimdi joǵaltyp aldym. Sodan beri qujatsyz júrdim. Jaqynda Jylyoı aýdandyq polıtsııa bólimi qyzmetkerleriniń kómegimen jeke kýáligimdi aldym», -deıdi Edýard Tarasov
Oblystyq polıtsııa departamentiniń bastyǵy, polıtsııa polkovnıgi Qamza Úmbetqalıevtyń aıtýynsha, osy kezge deıin Qazaqstan Respýblıkasynyń aýmaǵynda jeke basty kýálandyratyn qujattarsyz júrgen 169 azamat anyqtalǵan.
«Onyń ishinde 50 adam KSRO pasportymen júrgeni belgili boldy. Al 51 adamnyń basqa qujattardy paıdalanǵany, 67 adamnyń azamattyǵy joq dep tanylǵany anyqtaldy. Prezıdent Jarlyǵymen Qazaqstan Respýblıkasynyń azamattyǵynan shyǵýyna baılanysty azamattyǵy joq dep tanyǵan 1 adam ustaldy. Qazirge deıin 148 adamdy qujattandyrý jumysyy júrgizildi», -deıdi Qamza Úmbetqalıev.
Eske sala ketelik, budan buryn Atyraýda jyl basynan beri túnimen qydyrǵan 1500 jasóspirim ustalǵanyn jazǵan bolatynbyz.
