Atyraý oblysynda 26 myńnan kásipkerlik nysanyn áıelder basqarady
Bul týraly oblys ákimi Mahambet Dosmuhambetov «Jetistik joldary: áıelder belsendiliginiń qoǵamdaǵy róli» atty oblystyq áıelder forýmynda málim etti.
«Táýelsizdik alǵannan bergi 30 jyldaǵy tarıhı tabystarymyzdy saralaǵanda, buǵan áıel-analardyń qosqan eńbegi erekshelenip turady. Osy kezeńde otbasylyq qundylyqtardy ornyqtyrýda da irgeli isterińiz kóp. Otbasylyq saıasatty jetildirý, ana men balany qoldaý maqsatynda mańyzdy qujattar qabyldanyp, tutastaı júıe quryldy. Qazaqstanda Otbasy kúni belgilenip, kópbalaly otbasylardy áleýmettik qoldaýdyń ulttyq modeli qalyptasty. Jyl saıyn «Mereıli otbasy» ulttyq konkýrsy ótkizilip, kóptegen naqty is-shara júzege asyryldy. Osyndaı ıgi ister ár otbasynyń bosaǵasynyń beriktigin bekemdeýge septigin tıgizdi. Munyń barlyǵy – táýelsiz Otanymyzdyń baıandy bolashaǵy úshin jasalǵan naqty qadamdar», -dedi Mahambet Dosmuhambetov.
Ákimniń aıtýynsha, oblysta «Batyr analar» sany 10 myńnan asady. Al, bıyl jergilikti atqarýshy organdardyń turǵyn úı qorynan 222 otbasyna baspana berilgen. Sondaı-aq, «Baqytty otbasy» baǵdarlamasymen 400-ge jýyq otbasy turǵyn úımen qamtylǵan. Mamandyqtarǵa qatysty statıstıkaǵa súıensek, oblysta pedagogtardyń 85, medıtsına qyzmetkerleriniń 72, sondaı-aq, memlekettik qyzmetshilerdiń 60 paıyzyn áıelder qurap otyr.
«Atyraýda shaǵyn jáne orta bıznestiń órkendeýine áıel-kásipkerler de úles qosyp keledi. Bıyl áıelder basqaratyn shaǵyn jáne orta kásipkerlik sýbektileriniń sany ótken jylmen salystyrǵanda 8 paıyzǵa artyp, 26 myńnan asty. Bul jalpy tirkelgen shaǵyn jáne orta bıznes sýbektiler sanynyń 45 paıyzyn qurady», -dep málim etti oblys ákimi.
«Parasat», «Qurmet» ordenderiniń ıegeri, Atyraý oblysynyń Qurmetti azamaty Rashıla Mursalıevanyń aıtýynsha, táýelsizdiktiń eleń-alańynda qıyndyqtar kezdesken.
«Sol kezeńde áıelder erlermen birdeı eńbek etip, ózderiniń qoǵamdaǵy ornyn nyqtaı aldy. Al, qıyndyqtyń barlyǵy artta qaldy. Búgingi jetistikter – táýelsizdiktiń jemisi. Óıtkeni, Elbasy da, Memleket basshysy da áıelderge árdaıym qoldaý bildirip otyr. Bul – biz úshin úlken demeý», -dedi ol.
Forým kezinde óńirdiń qoǵamdyq ómirine belsene aralasyp júrgen bir top áıel Prezıdent janyndaǵy áıelder isteri jáne otbasylyq-demografııalyq saıasat jónindegi Ulttyq komıssııa tóraǵasynyń jáne oblys ákiminiń Alǵys hatymen marapattaldy.
Eske sala ketelik, buǵan deıin Atyraý oblysy turǵyndarynyń 36 paıyzy sportpen shuǵyldanatynyn https://kaz.inform.kz/news/atyrau-oblysy-turgyndarynyn-36-payyzy-sportpen-shugyldanady_a3877904 jazǵan edik.
