Atyraý oblysynda 211 jylqynyń qandaı aýrýǵa shaldyqqany anyqtaldy
Oblys ákiminiń orynbasary Qaırat Nurlybaevtyń málimetinshe, naýryzdan beri 211 jylqy aýrýǵa shaldyqqan.
«Isataı Qurmanǵazy jáne Mahambet aýdandarynda bıylǵy naýryz aıynan beri 56 jeke turǵyn men 5 sharýa qojalyǵyna qarasty 211 jylqy belgisiz aýrýmen aýyrǵany anyqtaldy. Onyń ishinde 75 jylqy óldi. Al, 136 jylqyǵa sımptomatıkalyq emdeý sharalary júrgizilip jatyr», -deıdi Qaırat Nurlybaev.
Onyń aıtýynsha, aýrý sebebin anyqtaý úshin ólgen jylqydan qan synamalary alynǵan. Synamalar men patologııalyq materıaldar respýblıkalyq veterınarııalyq zerthanaǵa, Ulttyq referenttik veterınarııa ortalyǵyna, Bıologııalyq qaýipsizdik máseleleri boıynsha zertteý ınstıtýty jáne Qazaq ǵylymı-zertteý veterınarııa ınstıtýtyna jiberilgen.
«Jylqynyń aýrýyna veterınarııalyq baqylaý jáne qadaǵalaý komıtetine ǵalymdardy shaqyrtý jóninde hat joldandy. Oblysqa kelgen mamandar Qurmanǵazy, Isataı, Mahambet, Qyzylqoǵa aýdandaryn aralap, aýyrǵan jylqydan synamalar aldy. Hattamaǵa sáıkes delafondıoz aýrynyń qozdyrǵyshy, gastrofılez, jylqy paraskarıdozy anyqtaldy. Ǵalymdardyń aldyn ala saraptamasyna sáıkes, atalǵan qozdyrǵysh mal óliminiń sebebi bolyp otyr. Osyǵan baılanysty ǵalymdar bul aýrýmen kúresý úshin mal ıeleri men veterınarııalyq dárigerlerge qan parazıtarlyq aýrýlar men gelmıntozdardy emdeý jáne aldyn-alý sharalar boıynsha jumystardy júrgizýdi usynyp otyr», -dedi oblys ákiminiń orynbasary Qaırat Nurlybaev.
Eske sala ketelik, budan buryn Atyraý oblysynda jylqy qyrylyp jatqanyn habarlaǵan bolatynbyz.
