Atyraý oblysynda 21 mektep shtattyq rejımde jumys istep tur
Qyzylqoǵa aýdanyna qarasty Kenbaı eldimekenindegi Tasym Januzaqov atyndaǵy bastaýysh mektepte oqýshylar eki aýysymda bilim alyp jatyr.
«Túske deıin eki synyp jáne mektepaldy daıarlyq toby oqıdy. Birinshi synypta úsh oqýshy, ekinshi synypta bes oqýshy bar. Mektepaldy daıarlyq tobynda úsh bala bilim alyp jatyr. Tústen keıin úshinshi, tórtinshi synypta barlyǵy segiz bala oqýda» deıdi Tasym Januzaqov atyndaǵy bastaýysh mektebiniń meńgerýshisi Jumazııa Keldibaeva.
Jıyrma shaqty úı turatyn Kenbaı aýylyndaǵy mektepte 8 muǵalim jumys isteıdi. Munda 16 oqýshy bilim alyp jatyr. Shaǵyn bolǵanyna qaramastan, mektep mýltımedıalyq taqtamen, kompıýtermen jabdyqtalǵan.
Keń jolaqty ınternet jelisine qosylǵan mektepte aýyl balalary úshin ınformatıkadan qosymsha dáris berilýde.
Shtattyq rejımdegi taǵy bir mektep Qyzylqoǵa aýdanyna qarasty Janterek eldimekeninde ornalasqan. Jyldyń basynda ǵana jańa ǵımaratqa kóshken mektepte 41 oqýshy dástúrli formatta bilim alyp jatyr.
№75 bastaýysh mektebiniń meńgerýshisi Gúljaýǵan Sultanovanyń aıtýynsha, munda barlyǵy 33 oqýshy, mektepaldy daıarlyq tobynda 8 oqýshy bilim alyp jatyr.
«Mektepte 9 muǵalim bar. 60 oryndyq mektep sport zal, ashanamen qamtamasyz etilgen» deıdi ol.
Bastaýysh synyp balalarǵa árip tanytýdan bastap, oqýshylardy ǵylymı jumysty qorǵaý deńgeıine deıin shyǵaryp jatyr.
«Máselen, «Qazaqtyń ulttyq sýsyny shubat» taqyrybynda ǵylymı jumysyn qorǵaǵan oqýshym Іnjý Sákenqyzy Qazaqstan boıynsha birinshi oryn alyp, jumysy respýblıkalyq jınaqqa endi» deıdi atalǵan mekteptiń bastaýysh synyp muǵalimi Nuran Omarova.
Eske sala ketelik, Atyraý oblysynda shtattyq rejımde jumys istep jatqan 21 mektepte 3111 muǵalim dáris berýde. Onda barlyǵy 1295 oqýshy bilim alyp jatyr.