Atyraý oblysynda 2082 medıtsına qyzmetkerine ústemeaqy tólendi
ATYRAÝ. QazAqparat –Atyraý oblysynda 2082 medıtsına qyzmetkerine 800 mln teńgeden astam somaǵa ústemeaqy tólendi, dep habarlaıdy QazAqparat.
Oblystyq Densaýlyq saqtaý basqarmasynyń basshysy Nurlybek Qabdyqaparovtyń málimetinshe, medıtsına qyzmetkerlerine ústemeaqy ártúrli kólemde tólengen.
«Memleket basshysynyń tapsyrmasyna oraı berilip jatqan bul qarjylaı yntalandyrý kómegi medıtsına salasynyń mamandaryna úlken qoldaý boldy. QR Densaýlyq saqtaý mınıstrliginiń buıryǵyna sáıkes, tek ótken aıda 2082 medıtsına qyzmetkerine 800 mıllıon teńgeden astam somaǵa ústemeaqy tólendi. Sonyń ishinde dárigerlerge 850 myń teńge, orta býyn medıtsına qyzmetkerlerine 450 myń teńge, kishi býyn sala mamandaryna 250 myń teńgeden naýryz aıynan bastap aı saıyn ústemeaqyny tóleý júzege asyryldy» - dedi Nurlybek Qabdyqaparov.
Eske sala ketelik, Atyraý oblysynda karantındik shekteý sharalary 31 tamyzǵa deıin uzartyldy.
