Atyraý oblysynda 2025 jylǵa deıin 7 mln kóshet egiledi
ATYRAÝ. QazAqparat – Atyraý oblysynda 2025 jylǵa deıin 7 mln kóshet egiledi, dep habarlaıdy QazAqparat.
Oblystyq tabıǵı resýrstar jáne tabıǵat paıdalanýdy retteý basqarmasy basshysynyń orynbasary Nurgúl Qalıevanyń málimetinshe, Atyraý oblysynda ormandardy molyqtyrý men orman ósirýdiń 2021-2025 jyldarǵa arnalǵan keshendi jospary ázirlengen.
«Atyraý oblysynda aldaǵy bes jylda 7 mln kóshet egý josparlanyp otyr. Bıyl 309 gektar aýmaqqa 905 myń kóshet egý josparlanyp, kóktemde 250 gektarǵa 700 myńnan astam kóshet egildi. Kóshettiń qalǵanyn osy kúzde egý kózdelip otyr. Kóshetter Qurmanǵazy, Inder, Mahambet aýdandarynyń orman alqabynda, Atyraý qalasynyń aýmaǵynda, sondaı-aq, eldi mekenderde otyrǵyzylady. Egilgen kóshetterdi kútý, sýarý, otaý sekildi jumystardy orman sharýashylyǵy jáne janýarlar dúnıesi aýmaqtyq ınspektsııasy júzege asyrady» - deıdi Nurgúl Qalıeva.
Eske sala ketelik, buǵan deıin Atyraýda «Bul – meniń aǵashym» aktsııasy aıasynda 1 myńǵa jýyq kóshet egilgenin jazǵan edik.
